उरुळी कांचन (पुणे): दिवसा, रात्री-अपरात्री मॉडिफाईड बुलेटद्वारे कर्णकर्कश आवाज, सायलेन्सरमधून फटाके, बेदरकार रॅली आणि धिंगाणा घालणाऱ्यांना 29 मॉडीफाय बुलेट सायलेन्सरवर उरुळी कांचन पोलिसांनी रोडरोलर फिरवला आहे. केवळ नियम मोडणाऱ्या वाहनचालकांवरच नव्हे, तर अशा वाहनांमध्ये बेकायदेशीर फेरफार (बदल) करणाऱ्या गॅरेजचालकांवरही थेट कारवाईचा इशारा दिला आहे.
उरुळी कांचन पोलीस ठाण्याच्या हद्दीतील नागरिकांकडून आलेल्या तक्रारींची दखल घेत राबवलेल्या विशेष मोहिमेअंतर्गत तब्बल 13 बुलेटवर कारवाई करत 1 लाख 6 हजार 500 रुपयांचा दंड ठोकण्यात आला आहे, तर जप्त केलेल्या 29 मॉडीफाय सायलेन्सरवर थेट रोलर फिरवून ते नष्ट करण्यात आले आहेत.
उरुळी कांचन व परिसरात गेल्या काही दिवसांपासून काही हुल्लडबाज बुलेटस्वार सायलेन्सर मॉडीफाय करून फटाक्यांसारखे मोठे आवाज काढत सुसाट गाड्या चालवत होते. तसेच बेकायदेशीरपणे कर्कश हॉर्न वाजवणे आणि नंबर प्लेट नसताना गाड्या चालवण्याचे प्रकार वाढले होते. या धुमाकूळ घालणाऱ्या चालकांमुळे वृद्ध, आजारी व्यक्ती, लहान मुले आणि सामान्य नागरिक पुरते हैराण झाले होते. या संदर्भात नागरिकांनी उरुळी कांचन पोलिसांकडे सातत्याने तक्रारी नोंदवल्या होत्या.
या मोहिमेदरम्यान नियमांचे उल्लंघन करणाऱ्या 13 बुलेट सायकलींवर माननीय प्रादेशिक परिवहन अधिकारी (RTO) पुणे यांच्यामार्फत दंडात्मक कारवाई करण्यात आली. या बुलेट चालकांकडून 1 लाख 6 हजार 500 रुपयांचा दंड वसूल करण्यात आला आहे. एवढेच नव्हे तर, यापूर्वी जप्त करण्यात आलेले 29 मॉडीफाय सायलेन्सर रस्त्यावर ठेवून त्यावर थेट रोलरच्या साहाय्याने चेपून ते कायमचे नष्ट करण्यात आले. पोलिसांच्या या भूमिकेमुळे नियम मोडणाऱ्या चालकांचे धाबे दणाणले आहेत.
सदरची धडक कारवाई उरुळी कांचन पोलीस ठाण्याच्या वरिष्ठ पोलीस निरीक्षक विजयमाला पवार यांच्या मार्गदर्शनाखाली वाहतूक विभागाचे सहायक फौजदार रमेश भोसले, पोलीस अंमलदार चव्हाण, अमोल खांडेकर, अश्वजीत मोहोड आणि पोलीस अंमलदार भोसले यांच्या पथकाने यशस्वीरीत्या पार पाडली.
“नियम मोडल्यास गाड्या जप्त करणार”
“उरुळी कांचन पोलीस ठाण्याच्या हद्दीत सायलेन्सर मॉडीफाय करून आवाज काढणे, कर्कश हॉर्न वाजवणे किंवा विना नंबर प्लेट गाड्या चालवून दहशत पसरवण्याचा प्रयत्न केल्यास गय केली जाणार नाही. वाहतुकीच्या नियमांचे उल्लंघन करणाऱ्यांवर यापुढेही अशीच कठोर आणि दंडात्मक कारवाई चालूच राहील,” असा इशारा उरुळी कांचन पोलिसांकडून देण्यात आला आहे.
