उरुळी कांचन, (पुणे) : पुणे – सोलापूर महामार्गावर सोरतापवाडी फाटा परिसरात दुचाकीने ट्रकला पाठीमागून जोरात दिलेल्या धडकेत दुचाकीवरील एका तरुणाचा जागीच मृत्यू झाला आहे. तर एक तरुण गंभीर जखमी झाला आहे. गुरुवारी (ता. 14) सायंकाळी सव्वा चार वाजण्याच्या सुमारास सोलापूरच्या दिशेने जाणाऱ्या मार्गावर ही घटना घडली आहे. शुभम धबडे असे अपघातात मृत्यू झालेल्या तरुणाचे नाव आहे. तर सुनील विकास घोडके (वय-25, रा. दोघेही, रा. सोलापूर) असे अपघातात जखमी झालेल्या तरुणाचे नाव आहे.
मिळालेल्या माहितीनुसार, शुभम धबडे व सुनील घोडके हे दुचाकीवरून उरुळी कांचनच्या बाजूने निघाले होते. यावेळी दुचाकीवरील नियंत्रण सुटल्याने दुचाकीने पाठीमागून समोर निघालेल्या ट्रकला जोरदार पाठीमागून जोरदार धडक दिली. या अपघातात शुभम धबडे याच्या डोक्याला गंभीर दुखापत झाली होती. यातच त्याचा जागीच मृत्यू झाला.
सदर अपघातातील सुनील घोडकेला उरुळी कांचन येथील सिद्धिविनायक रुग्णालयात कदम रुग्णवाहिकेचे वैभव कदम व त्यांच्या साथीदारांच्या मदतीने हलविण्यात आले आहे. सदरचा अपघात कसा झाला याची अद्याप माहिती मिळू शकली नाही.
दरम्यान, रस्त्याच्या दोन्ही बाजूला वाहनचालकांनी व बघ्यांनी मोठी गर्दी केली असून घटनास्थळी उरुळी कांचन पोलीस ठाण्यातील पोलीस उपनिरीक्षक प्रविण कांबळे, सहायक पोलीस उपनिरीक्षक रमेश भोसले, पोलीस हवालदार कमलेश होले, धनंजय भोसले, सोमनाथ चीपेकर दाखल झाले आहेत.
