वारजे: वैद्यकीय क्षेत्रातील आवश्यक पात्रता नसतानाही रुग्णांवर उपचार करणाऱ्या बोगस डॉक्टरांविरोधात पुणे महानगरपालिकेच्या आरोग्य विभागाने कारवाई सुरू केली आहे. वारजे परिसरातील एका क्लिनिकवर छापा टाकून महापालिकेच्या पथकाने संबंधित व्यक्तीविरोधात पोलिसांत गुन्हा दाखल केला आहे.
वारजेतील गोकुळनगर पठार परिसरातील गुरुकृपा क्लिनिकमध्ये ही कारवाई करण्यात आली. उद्धव चव्हाण असे गुन्हा दाखल झालेल्या व्यक्तीचे नाव आहे. उपलब्ध माहितीनुसार, चव्हाण याच्याकडे नॅचरोपॅथीचे प्रमाणपत्र असल्याचे आढळले. मात्र, वैद्यकीय उपचार करण्यासाठी आवश्यक पात्रता नसतानाही तो स्वतःच्या नावापुढे डॉक्टर ही पदवी वापरत असल्याचा आरोप आहे.
महापालिकेच्या वैद्यकीय पथकाला या क्लिनिकबाबत संशय आल्याने अचानक तपासणी करण्यात आली. क्षेत्रीय वैद्यकीय अधिकारी गणेश ढमाले यांच्या नेतृत्वाखाली पथकाने क्लिनिकची पाहणी केली. यावेळी तेथे सलाईन, विविध प्रकारची इंजेक्शन्स तसेच ॲलोपॅथीची औषधे मोठ्या प्रमाणात आढळून आली. संबंधित व्यक्ती या औषधांचा वापर करून रुग्णांवर उपचार करत असल्याचे तपासणीत समोर आल्याचे सांगण्यात आले.
काही दिवसांपूर्वी खराडी परिसरातही अशाच प्रकारची कारवाई करण्यात आली होती. तेथे बीएएमएसचे शिक्षण पूर्ण नसतानाही एका व्यक्तीने डॉक्टर म्हणून उपचार केल्याचे समोर आले होते.
वैद्यकीय पात्रता नसल्याचे आढळल्यानंतर महापालिकेच्या अधिकाऱ्यांनी पोलिसांना माहिती दिली. त्यानंतर वारजे माळवाडी पोलीस ठाण्यात संबंधित व्यक्तीविरोधात गुन्हा दाखल करण्यात आला आहे.
