फुरसुंगी, ता. १ : फुरसुंगीतील भेकराईनगर परिसरात रस्त्याच्या वादातून शेजाऱ्यांमध्ये तुफान राडा झाल्याची घटना २८ जून रोजी रात्री सुमारे १०.४३ वाजता घडली. किरकोळ वादाचे रूपांतर हाणामारीत झाले असून, आरोपींनी काठीने मारहाण करत घराबाहेर उभ्या असलेल्या दुचाकींची तोडफोड केली. एवढेच नव्हे तर पाळीव कुत्रा अंगावर सोडल्याने एका महिलेसह तिच्या दीराला कुत्र्याने चावा घेतल्याची धक्कादायक घटना समोर आली आहे. याप्रकरणी संबंधितांविरुद्ध गुन्हा दाखल करण्यात आला आहे.
संतोष बबन काळाने, हनुमंत फकीरा दिघे, सविता हनुमंत दिघे व सारिका संतोष काळाने या चार जणांवर फुरसुंगी पोलीस ठाण्यात गुन्हा दाखल करण्यात आला आहे. याप्रकरणी अमृता अशोक काळे (वय २७, रा. भेकराईनगर, फुरसुंगी) यांनी फिर्याद दिली आहे.
पोलिसांनी दिलेल्या माहितीनुसार, फिर्यादी अमृता काळे यांच्या शेजारी राहणारे संतोष बबन काळाने यांच्यासोबत पाच फूट रस्त्याच्या मालकीच्या वादावरून न्यायालयात दावा प्रलंबित आहे.संतोष काळाने हे घरासमोरून दुचाकीवर जात असताना फिर्यादी महिलेला कट मारल्याचा आरोप आहे.याबाबत जाब विचारला असता, “हा माझ्या बापाचा रस्ता आहे, मी कुठेही गाडी घालीन,” असे म्हणत संतोष काळाने यांनी वाद घालण्यास सुरुवात केली.
यानंतर संतोष काळाने यांची पत्नी सारिका, मुलगा पृथ्वीराज, भाचा हृषीकेश दिघे, तसेच हनुमंत फकीरा दिघे आणि सविता हनुमंत दिघे हे घटनास्थळी आले. सर्वांनी मिळून फिर्यादीच्या पती अशोक काळे यांना खाली पाडून लाथाबुक्क्यांनी मारहाण केल्याचा आरोप करण्यात आला आहे.
संतोष काळाने यांनी काठीने फिर्यादीचे दीर आकाश काळे यांच्या पाठीवर मारहाण केली. याचवेळी आरोपींनी घराबाहेर उभ्या असलेल्या युनिकॉर्न (MH-12 ZF-1255) आणि ज्युपिटर (MH-12 TQ-5887) या दुचाकींवर लोखंडी अँगलने वार करून त्यांचे नुकसान केल्याचे फिर्यादीत नमूद करण्यात आले आहे.
धक्कादायक बाब म्हणजे, संतोष काळाने यांनी त्यांचा पाळीव कुत्रा फिर्यादी आणि त्यांच्या दीराच्या अंगावर सोडल्याचा आरोप आहे. या हल्ल्यात कुत्र्याने अमृता काळे यांच्या उजव्या मांडीला, तर आकाश काळे यांच्या उजव्या पायाला चावा घेतला. जखमींना प्रथम पोलिसांनी वैद्यकीय तपासणीसाठी पाठविले. त्यानंतर त्यांनी उपचार घेऊन पोलीस ठाण्यात तक्रार दाखल केली.
