पुणे : हिंजवडी ते शिवाजीनगर मेट्रो मार्गिकेचे उद्घाटन आज पंतप्रधान नरेंद्र मोदी यांच्या हस्ते ऑनलाइन पद्धतीने होणार आहे. उद्घाटनानंतर 4 नोव्हेंबर 2026 पासून सकाळी 6 वाजता या मार्गावर प्रवासी सेवा सुरू होईल. ‘पुणेरी मेट्रो’ म्हणून ओळखल्या जाणाऱ्या या पिंक लाईनमुळे हिंजवडी, वाकड, बाणेर, औंध आणि शिवाजीनगर परिसरातील नागरिकांना मोठा दिलासा मिळणार आहे. या प्रकल्पामुळे पुण्याच्या सार्वजनिक वाहतूक व्यवस्थेत आणखी एक महत्त्वाची सुविधा उपलब्ध होणार आहे. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा अजित पवार हे देखील उद्घाटन सोहळ्याला उपस्थित राहणार आहेत.
माण-हिंजवडी ते शिवाजीनगर असा सुमारे 23.3 किलोमीटरचा हा मेट्रो मार्ग उभारण्यात आला आहे. सार्वजनिक-खासगी भागीदारीच्या माध्यमातून हा प्रकल्प पूर्ण करण्यात आला असून, त्यासाठी सुमारे 8,313 कोटी रुपये खर्च झाले आहेत. टाटा आणि सीमेन्स यांच्या सहभागातून स्थापन झालेल्या कंपनीने या मार्गाचे काम केले आहे. या मार्गावर एकूण 23 स्थानके आहेत. मात्र, सुरुवातीला 17 स्थानकांवरच मेट्रो सेवा सुरू होणार आहे.
पुणेरी मेट्रोचे तिकीट दर प्रवासाच्या अंतरानुसार निश्चित करण्यात आले आहेत. 0 ते 2 किमी प्रवासासाठी 12 रुपये, 2 ते 4 किमी अंतरासाठी 25 रुपये, 4 ते 8 किमीसाठी 37 रुपये, 8 ते 12 किमीसाठी 43 रुपये, 12 ते 18 किमीसाठी 49 रुपये, तर 18 किमीपेक्षा अधिक अंतराच्या प्रवासासाठी 62 रुपये तिकीट दर आकारला जाणार आहे.
4 नोव्हेंबरपासून पहिली मेट्रो सकाळी 6 वाजता धावेल. गर्दीच्या वेळेत दर 6 मिनिटांनी, तर इतर वेळेत दर 12 मिनिटांनी मेट्रो उपलब्ध असेल. माण स्थानकावरून जिल्हा न्यायालयासाठी शेवटची गाडी रात्री 10.30 वाजता सुटेल. तर जिल्हा न्यायालयावरून माणकडे जाणारी शेवटची मेट्रो रात्री 11.40 वाजता असेल. जिल्हा न्यायालय स्थानकावरून महामेट्रोच्या दोन्ही मार्गिकांना जोडणी मिळणार आहे. याशिवाय प्रवाशांना संयुक्त मोबाइल ॲप आणि एनसीएमसी कार्डची सुविधाही उपलब्ध होईल.
