पुणे: पुणे जिल्ह्यातील वाहतुकीसाठी महत्त्वाचा ठरणारा तळेगाव-चाकण-शिक्रापूर (एनएच-548डी) महामार्ग (Talegaon-Chakan Expressway) अखेर प्रत्यक्षात येण्याच्या दिशेने मोठे पाऊल पडले आहे. महाराष्ट्र राज्य पायाभूत सुविधा महामंडळामार्फत डीबीओटी तत्वावर हा रस्ता विकसित करण्याच्या कामाला राज्य मंत्रिमंडळाने मान्यता दिल्यानंतर अंतिम अध्यादेशही जारी करण्यात आला आहे. गेल्या अनेक वर्षांपासून प्रलंबित असलेल्या या प्रकल्पामुळे परिसरातील वाहतूक कोंडीचा प्रश्न सुटण्याची शक्यता निर्माण झाली आहे. (Latest Marathi News)
सुमारे 53 किलोमीटर लांबीचा हा मार्ग मुंबई-पुणे राष्ट्रीय महामार्ग आणि पुणे-संभाजीनगर महामार्गाला जोडणारा महत्त्वाचा दुवा आहे. औद्योगिकदृष्ट्या वेगाने विकसित होत असलेल्या चाकण परिसरामुळे या मार्गावर प्रचंड वाहतूक वाढली आहे. त्यामुळे तळेगाव ते शिक्रापूर दरम्यान वारंवार होणाऱ्या कोंडीमुळे वाहनचालकांना मोठा वेळ वाया जात होता.
नव्या आराखड्यानुसार तळेगाव ते चाकण या सुमारे 28.3 किलोमीटर अंतरावर चार पदरी उन्नत (एलिव्हेटेड) मार्ग उभारला जाणार आहे, तर संपूर्ण 53.2 किलोमीटर अंतरावर जमिनीवर चार पदरी रस्ता विकसित केला जाणार आहे. या मार्गावर 171 लहान आणि 4 मोठे जंक्शन, तसेच वाहतुकीसाठी 4 ठिकाणी रॅम्पची सोय असणार आहे. एकूण 7 टोल नाके उभारले जाणार असून संपूर्ण टोल वसुलीची रिअल टाइम निगराणी केली जाणार आहे.
या प्रकल्पाची अंदाजित किंमत सुमारे 4901.66 कोटी रुपये असून 25 वर्षांच्या टोल उत्पन्नावर आधारित आर्थिक मॉडेल तयार करण्यात आले आहे. प्रकल्पाचा एकूण सवलत कालावधी 29 वर्षांचा असेल. विशेष म्हणजे, अतिरिक्त टोल उत्पन्नात शासनाचाही वाटा असणार आहे, ज्यामुळे महसूल वाढण्याची अपेक्षा आहे.
गेल्या दशकभरापासून रखडलेल्या या प्रकल्पाला आता गती मिळाल्याने मावळ, खेड आणि शिक्रापूर परिसरातील नागरिकांना मोठा दिलासा मिळणार आहे. वाहतूक सुलभ होण्याबरोबरच औद्योगिक आणि आर्थिक विकासालाही चालना मिळण्याची शक्यता आहे.
