पुणे: महाराष्ट्रातील पावसाची स्थिती पुन्हा बदलताना दिसत आहे. बंगालच्या उपसागरात तयार झालेल्या हवामान प्रणालीचा परिणाम देशाच्या पूर्व आणि मध्य भागावर होत असून, महाराष्ट्रातील काही भागांमध्येही पावसाचा जोर वाढण्याची शक्यता आहे. भारतीय हवामान विभागाने दिलेल्या ताज्या अंदाजानुसार विदर्भात 23 ते 26 सप्टेंबरदरम्यान मुसळधार पावसाची शक्यता आहे. या काळात काही ठिकाणी मेघगर्जना आणि विजांचा कडकडाटही होऊ शकतो.
बंगालच्या उपसागरातील कमी दाबाचे क्षेत्र अधिक तीव्र होत 21 सप्टेंबरला डिप्रेशनमध्ये बदलले. त्यानंतर ते आणखी तीव्र होऊन डीप डिप्रेशनमध्ये रूपांतरित होण्याची शक्यता हवामान विभागाने व्यक्त केली होती. या प्रणालीचा पुढील प्रवास पश्चिम-वायव्य दिशेने असून, 23 सप्टेंबरच्या रात्रीपासून 24 सप्टेंबरच्या पहाटेपर्यंत उत्तर आंध्र प्रदेश आणि दक्षिण ओडिशाच्या किनारपट्टीवर त्याचा परिणाम होण्याचा अंदाज आहे.
या हवामान प्रणालीमुळे ओडिशा आणि आंध्र प्रदेशातील काही भागांत जोरदार पाऊस आणि वादळी परिस्थिती निर्माण होण्याची शक्यता आहे. त्यामुळे किनारी भागातील नागरिकांना तसेच मच्छीमारांना हवामान विभागाच्या सूचनांचे पालन करण्याचा सल्ला देण्यात आला आहे.
महाराष्ट्राचा विचार केला तर 22 सप्टेंबरला कोकण-गोवा आणि मध्य महाराष्ट्रात मुसळधार पावसाचा इशारा आहे. मराठवाड्यात मेघगर्जनेसह पावसाची शक्यता असून 23 सप्टेंबरला या भागात मुसळधार पावसाचा इशारा देण्यात आला आहे.
विदर्भासाठी मात्र पुढील काही दिवस अधिक महत्त्वाचे आहेत. 23 आणि 24 सप्टेंबरला मुसळधार पावसासोबत मेघगर्जना आणि विजांचा इशारा आहे. 25 आणि 26 सप्टेंबरलाही मुसळधार पाऊस सुरू राहण्याची शक्यता आहे. त्यानंतर 27 सप्टेंबरपासून विदर्भासाठी सध्या कोणताही विभागीय इशारा देण्यात आलेला नाही.
