न्हावरे: दहिवडी (ता. शिरूर) परिसरातील (Shirur News) मांजरेवस्ती येथे मंगळवारी (ता .१७) सायंकाळी सुमारे ५ वाजण्याच्या सुमारास १२ वर्षीय मुलाचा मृतदेह अर्धनग्न अवस्थेत आढळून आल्याने संपूर्ण परिसरात मोठी खळबळ उडाली आहे. साईराज गणेश मांजरे (वय १२, रा. मांजरेवस्ती, दहिवडी, ता. शिरूर, जि. पुणे) असे मृत मुलाचे नाव आहे. (Latest Marathi News)
मिळालेल्या माहितीनुसार, दादाभाऊ मांजरे यांच्या विहिरीजवळ साईराजचा मृतदेह आढळून आला. साईराज हा तळेगाव ढमढेरे येथील राय कुमार गुजर प्रशालेत इयत्ता सहावीत शिक्षण घेत होता. मृतदेह अर्धनग्न अवस्थेत सापडल्याने नागरिकांमध्ये भीतीचे वातावरण निर्माण झाले असून, काहींनी नरबळीची शक्यता व्यक्त केली आहे.
स्थानिक नागरिकांच्या म्हणण्यानुसार, मुलाला विहिरीत बुडवून मारण्यात आल्याचा संशय व्यक्त करण्यात येत आहे. घटनेचे गांभीर्य लक्षात घेता संतप्त नागरिकांनी गुन्हा दाखल झाल्याशिवाय मृतदेह हलविण्यास नकार दिला. त्यानंतर पोलिसांनी गुन्हा दाखल करून पुढील कारवाई सुरू केली.
दरम्यान, २१ जून २०२४ मध्ये याच ठिकाणी यश शरद गायकवाड (वय ११) या मुलाचा देखील अशाच प्रकारे मृत्यू झाल्याची घटना घडली होती. त्यामुळे या दोन घटनांमधील साम्यामुळे परिसरात भीती व संशयाचे वातावरण अधिक गडद झाले आहे.
घटनास्थळी शिरूरचे उपविभागीय पोलीस अधिकारी प्रशांत ढोले, शिक्रापूर पोलीस ठाण्याचे निरीक्षक दिपरतन गायकवाड तसेच वनविभागाचे अधिकारी उपस्थित होते. फॉरेन्सिक पथकाने घटनास्थळाची पाहणी करून नमुने गोळा केले असून, पोलिसांचे श्वानपथकही तपासासाठी दाखल झाले आहे.
या घटनेचा पुढील तपास पोलीस करत असून, मृत्यूचे नेमके कारण शवविच्छेदन अहवालानंतर स्पष्ट होणार आहे.
