शिरूर: सविंदणे (ता. शिरूर) येथील क्रीडा शिक्षक नितीन चव्हाण (Shirur News) यांचे मंगळवारी (दि.२४) रात्री अपहरण करून भरचौकात बेदम मारहाण केल्याची धक्कादायक घटना घडली. दहा ते पंधरा जणांच्या टोळक्याने घरात घुसून त्यांना जबरदस्तीने उचलून नेल्याने गावात संतापाचे वातावरण निर्माण झाले आहे. याप्रकरणी पोलिसांकडून गंभीर स्वरूपाचा गुन्हा दाखल करण्याचे काम रात्री उशिरापर्यंत सुरू होते अशी माहिती समोर आली आहे. त्यामुळे या प्रकरणाने वेगळे वळण घेतले असल्याचे बोलले जात आहे.
स्थानिक ग्रामस्थांकडून मिळालेल्या माहितीनुसार, चव्हाण हे सायंकाळी घरी विश्रांती घेत असताना अचानक काही जणांनी त्यांच्या घरात प्रवेश केला. संबंधितांनी चव्हाण यांना जबरदस्तीने बाहेर खेचत नेले. काही वेळानंतर टोळक्याने चव्हाण यांना गावातील मुख्य चौकात आणून लाथाबुक्क्यांनी तसेच काठ्या- दांडक्यांनी बेदम मारहाणही केली. यावेळी काहींच्या हातात कोयते असल्याचेही प्रत्यक्षदर्शींनी सांगितले. या प्रकारामुळे परिसरात मोठी खळबळ उडाली.
दरम्यान, या घटनेच्या निषेधार्थ विद्यालयातील विद्यार्थ्यांनी व ग्रामस्थांनी बुधवारी सकाळी ठिय्या आंदोलन छेडले. “आमच्या शिक्षकांना न्याय मिळाल्याशिवाय आंदोलन मागे घेणार नाही,” असा ठाम इशारा विद्यार्थ्यांनी दिला. ‘आमच्या शिक्षकांना न्याय द्या’ अशा घोषणा देत विद्यार्थ्यांनी फलक हातात घेत निषेध व्यक्त केला. पालकांचाही आंदोलनात मोठ्या प्रमाणावर सहभाग होता.
घटनेची माहिती मिळताच पोलिस घटनास्थळी दाखल झाले. त्यानंतर पोलिस निरीक्षक संदेश केंजळे यांनी ग्रामस्थ व विद्यार्थ्यांशी संवाद साधत घटनेची सखोल चौकशी करून दोषींवर कठोर कारवाई करण्याचे आश्वासन दिले.आरोपींवर तात्काळ गुन्हा दाखल करून अटक करावी, अशी मागणी उपस्थित आंदोलकांनी केली. सुमारे चार तास चाललेल्या आंदोलनानंतर पोलिसांच्या आश्वासनानंतर आंदोलन स्थगित करण्यात आले.
रात्री उशिरापर्यंत गुन्हा दाखल करण्याची प्रक्रिया सुरू होती.या घटनेमुळे सविंदणे परिसरात तणावाचे वातावरण निर्माण झाले असून, शिक्षकांच्या सुरक्षेचा प्रश्न ऐरणीवर आला आहे.या गंभीर घटनेचा पोलिसांकडून पुढील अधिक तपास सुरू आहे.
