फुरसुंगी, ता. 19 : जिद्द, चिकाटी आणि दुर्दम्य इच्छाशक्तीच्या जोरावर फुरसुंगी सायकलिस्ट ग्रुपच्या 11 सदस्यांनी फुरसुंगी (पुणे) ते जगन्नाथ पुरी (ओडिशा) असा तब्बल 1 हजार 600 किलोमीटरचा सायकल प्रवास अवघ्या सात दिवसांत पूर्ण केला. महाराष्ट्र, तेलंगणा, आंध्र प्रदेश आणि ओडिशा या चार राज्यांतून प्रवास करत सायकलस्वारांनी जगन्नाथ मंदिरात पोहोचून आपल्या मोहिमेची यशस्वी सांगता केली.

या सायकल मोहिमेचा प्रारंभ गुरुवारी (ता. 12 ) पहाटे साडे तीनवाजता फुरसुंगी येथील ग्रामदैवत श्री शंभू महादेवाचे दर्शन घेऊन करण्यात आला. त्यानंतर सोलापूर, संगारेड्डी, खम्मम, राजमुंद्री, विशाखापट्टणम आणि ब्रह्मपूर असा प्रवास करत बुधवारी (ता. 18) सायकलस्वार जगन्नाथ पुरी येथे पोहोचले. दररोज सरासरी 250 किलोमीटर अंतर पार करत त्यांनी ही मोहीम पूर्ण केली.
या प्रवासादरम्यान ओडिशा राज्यात प्रचंड वादळ, समोरून वाहणारे वेगवान वारे आणि पावसाचा सामना करावा लागला. मात्र, प्रतिकूल परिस्थितीपुढे हार न मानता सर्व सायकलस्वारांनी जिद्दीने प्रवास सुरू ठेवला. विशेष म्हणजे, या मोहिमेत केवळ साहसी प्रवासालाच महत्त्व न देता पर्यावरण संवर्धन आणि इंधन बचतीचा संदेशही देण्यात आला. आंध्र प्रदेशातील तुन्नी गावात सायकलस्वारांच्या हस्ते वृक्षारोपण करण्यात आले.

या मोहिमेत गुणवंत गायकवाड सर, राम लावंड, प्रवीण भोसले सर, जीवन पवार, प्रशांत कामठे, तानाजी अडागळे, राघवराव, प्रशांत लोंढे, गोरखभाऊ कामठे, किरण कामठे आणि संतोष मसुडगे यांनी सहभाग घेतला.
दरम्यान, यापूर्वीही या ग्रुपने पंढरपूर, तुळजापूर, अक्कलकोट, तिरुपती बालाजी आणि अयोध्या राम मंदिर अशा विविध धार्मिक स्थळांच्या सायकल मोहिमा यशस्वीपणे पूर्ण केल्या आहेत. सात दिवसांत 1 हजार 600 किलोमीटरचा टप्पा पार करणाऱ्या या सायकलवीरांचे फुरसुंगीसह पंचक्रोशीतील ग्रामस्थांकडून अभिनंदन होत आहे.







