शिरूर: रांजणगाव एमआयडीसी परिसरात स्क्रॅप व्यवसाय करणाऱ्या महिलेच्या टेम्पोला अडवून दरमहा ५० हजार रुपयांच्या खंडणीची मागणी करून मारहाण व धमकी दिल्याची धक्कादायक घटना घडली आहे. या प्रकरणी रांजणगाव एमआयडीसी पोलीस ठाण्यात तिघांविरुद्ध गंभीर कलमांखाली गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, फिर्यादी योगिनी सचिन सांबारे (वय ३३ ,रा. निमगाव भोगी, ता. शिरूर, जि. पुणे) या स्क्रॅप व्यवसाय करतात. दरम्यान शुक्रवारी (ता. २०) दुपारी दीड वाजण्याच्या सुमारास रांजणगाव एमआयडीसीतील जाबील कंपनी ते परीटवाडी रोडवरून जाणारा सांबारे यांचा स्क्रॅपने भरलेला टेम्पो (एमएच-१२-वाय. बी-०३४४) आरोपींनी येथील इलेक्ट्रॉनिक कंपनीजवळ अडवला.
यावेळी आरोपी साहिल दीपक मलगुंडे, गणेश कोळपे (पूर्ण नाव माहित नाही) व एक अनोळखी इसम (रा. ढोकसांगवी, ता. शिरूर, जि. पुणे) यांनी “ही आमची हद्द आहे, येथे काम करायचे असेल तर दरमहा ५० हजार रुपये द्यावे लागतील,” अशी मागणी करत शिवीगाळ केली.तसेच पैसे न दिल्यास गाड्या चालू देणार नाही, गाड्या फोडून टाकू अशी धमकी दिली.
याचदरम्यान फिर्यादींचे सुपरवायझर दत्तात्रय जाधव यांना संबंधित आरोपींनी मारहाण केली. घटनेनंतर आरोपी तेथून पसार झाले. या प्रकारामुळे परिसरात भीतीचे वातावरण निर्माण झाले आहे. या प्रकरणी गुन्हा दाखल करण्यात आला असून, या घटनेचा पुढील पोलीस निरीक्षक महादेव वाघमोडे यांच्या मार्गदर्शनाखाली सुरू आहे.
