लोणी काळभोर, ता. 12 : प्रेमसंबंधातून निर्माण झालेल्या वैरातून एका महिलेचे अश्लील फोटो व व्हिडिओ सोशल मीडियावर व्हायरल करून तिची व कुटुंबाची बदनामी केल्याचा घटना घडली आहे. ही घटना लोणी काळभोर परिसरात घडली असून या गुन्ह्यातील मुख्य आरोपीला पोलिसांनी हिंगोली येथून शुक्रवारी (ता.10) रात्री दहा वाजण्याच्या सुमारास अटक केली आहे. आरोपीला न्यायालयात हजर केले असता, न्यायालयाने तीन दिवसांची पोलीस कोठडी सुनावली आहे.
सुनिल रामप्रसाद मुटकुळे (रा. अकोले, ता. संगमनेर, जि. अहिल्यानगर) असे अटक करण्यात आलेल्या आरोपीचे नाव आहे. याप्रकरणी कदमवाकवस्ती येथील एका 37 वर्षीय महिलेने लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, पिडीता या घरकाम करून कुटुंबाचा उदरनिर्वाह करतात. त्यांचे पती चारचाकी वाहन चालवून कुटुंबाला हातभार लावतात. सन 2017 मध्ये त्या एका हॉटेलमध्ये काम करत असताना. आरोपी सुनिल मुटकुळे याच्याशी त्यांची ओळख झाली होती. ओळख वाढत जाऊन त्याचे प्रेमसंबंधात रूपांतर झाले.
काही काळानंतर आरोपी सुनिल हा गावी निघून गेला, मात्र दोघांमध्ये फोनवरून संपर्क सुरू होता. दरम्यान 2021 मध्ये पतीसोबत वाद झाल्यानंतर पिडीता सुनिलकडे संभाजीनगर येथे गेल्या. त्यानंतर सुमारे चार वर्षे त्या आरोपीसोबत राहिल्या. या काळात आरोपीने फिर्यादींचे परवानगीशिवाय खासगी फोटो व व्हिडिओ चित्रीत केले आहे.
दरम्यान, आरोपीकडून वारंवार होणाऱ्या त्रासाला कंटाळून फिर्यादी फेब्रुवारी 2026 मध्ये पुन्हा आपल्या पतीकडे परतल्या. यानंतर आरोपीने सूडबुद्धीने सोशल मीडियाचा वापर करत बनावट इन्स्टाग्राम अकाउंट तयार करून महिलेचे अश्लील फोटो व व्हिडिओ व्हायरल करण्यास सुरुवात केली. आरोपीने अनेक फेक आयडीद्वारे हे फोटो नातेवाईकांपर्यंत पोहोचवण्यात आले. या प्रकारामुळे फिर्यादी व त्यांच्या कुटुंबाची समाजात मोठ्या प्रमाणात बदनामी झाली असून फिर्यादींना मानसिक धक्का बसला आहे.
सुरुवातीला बदनामीच्या भीतीने पिडीता यांनी मौन बाळगले, मात्र प्रकार सुरूच राहिल्याने अखेर त्यांनी धैर्य दाखवत लोणी काळभोर पोलीस ठाण्यात तक्रार दाखल केली. त्यानुसार आरोपीच्या विरोधात भारतीय न्याय संहीता कलम 74,75,77,356 (2) माहिती तंत्रज्ञान कायदा कलम 66, 66 (ई),66 (क), 67 (अ) प्रमाणे गुन्हा दाखल करण्यात आला आहे. गुन्हा दाखल होताच, पोलिसांनी तांत्रिक माहितीच्या आधारे आरोपीचे लोकेशन काढून हिंगोली येथून मोठ्या शिताफीने अटक केली आहे. आरोपीला न्यायालयात हजर केले असता, न्यायालयाने आरोपीला पोलीस कोठडीत तीन दिवसांची रिमांड ठोठावली आहे.
ही कामगिरी लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे, सहाय्यक पोलीस निरीक्षक अंकुश बोराटे, पोलीस उपनिरीक्षक दिगंबर सोनटक्के, पोलीस हवालदार अण्णा माने, पोलीस अंमलदार गणेश शिंदे, अमोल जाधव, सागर कदम, गणेश खरात, सागर धायतोंडे, अशोक गिरी व त्यांच्या सहकाऱ्यांनी केली आहे.
