आजपर्यंत नगरपालिकेच्या हद्दीत एकूण 16,190 मतदार असून, त्यापैकी 13,849 फॉर्मचे वितरण करण्यात आले आहे. यातील 7,800 मतदारांची ऑनलाइन नोंदणी पूर्ण झाली आहे.
मतदार यादी अद्ययावत व अचूक करण्यासाठी प्रत्येक पात्र नागरिकाने आपली नोंदणी, नावातील दुरुस्ती, पत्ता बदल तसेच आवश्यक कागदपत्रांची पूर्तता वेळेत करावी, असे आवाहन करण्यात आले आहे.
मुख्याधिकारी गजानन शिंदे यांनी सांगितले की, पात्र नागरिकांचे नाव मतदार यादीत समाविष्ट होणे आणि अपात्र नोंदी वगळणे ही लोकशाही प्रक्रियेसाठी अत्यंत महत्त्वाची बाब आहे. त्यामुळे नागरिकांनी संबंधित बूथस्तरीय अधिकारी (BLO) तसेच नगरपालिकेशी संपर्क साधून आवश्यक माहिती व कागदपत्रे सादर करावीत.
यासोबतच, कोणत्याही अफवा किंवा चुकीच्या माहितीवर विश्वास न ठेवता केवळ अधिकृत सूचनांवरच विश्वास ठेवावा, असेही मुख्याधिकाऱ्यांनी स्पष्ट केले.
जूनपासून या अभियानाची प्रक्रिया सुरू असून 29 जुलै ही शेवटची तारीख होती. मात्र, आता मुदतवाढ देण्यात आली असून 8 ऑगस्टपर्यंत नोंदणीची संधी उपलब्ध आहे.
नागरिकांनी मुदत संपण्यापूर्वी आवश्यक प्रक्रिया पूर्ण करून लोकशाही बळकट करण्यासाठी सहकार्य करावे, असे आवाहन भोर नगरपालिकेचे मुख्याधिकारी गजानन शिंदे यांनी केले आहे.
