पोपट पाचंगे
रांजणगाव गणपती : शिरूर तालुक्यातील जिल्हा परिषद गट तसेच पंचायत समिती (Shirur Panchayat Samiti Reservation Announced) गणांच्या आरक्षण सोडतीचा कार्यक्रम आज (ता.13)शिरूर येथील नवीन प्रशासकीय इमारतीच्या तिसऱ्या मजल्यावरील सभागृहात पार पडला असून, सन-2025 च्या नव्या आरक्षणानुसार जिल्हा परिषदेच्या सात गटांसह पंचायत समितीच्या चौदा गणांचे आरक्षण जाहीर करण्यात आले आहे. या आरक्षण सोडतीमुळे तालुक्यातील अनेक संभाव्य उमेदवारांचे राजकीय गणित कोलमडले असून, काहींची स्वप्ने भंग झाली आहेत. तर महिलांना या सोडतीमुळे मोठी राजकीय संधी मिळाल्याचे स्पष्ट दिसून येत आहे.
जिल्हा परिषदेच्या सात गटांपैकी चार गटांमध्ये महिला आरक्षण जाहीर झाले आहे. यात शिरूर ग्रामीण-न्हावरे जिल्हा परिषद गट ओबीसी महिला या प्रवर्गासाठी राखीव ठेवण्यात आला असून, रांजणगाव गणपती-कारेगाव, शिक्रापूर-सणसवाडी तसेच तळेगाव-ढमढेरे, रांजणगाव-सांडस हे गट सर्वसाधारण महिला या प्रवर्गासाठी राखीव करण्यात आले आहेत. तसेच टाकळीहाजी-कवठे यमाई आणि केंदूर-पाबळ हे गट सर्वसाधारण पुरुष प्रवर्गासाठी राखीव ठेवण्यात आले आहेत,तर वडगाव रासाई-मांडवगण फराटा हा गट इतर मागासवर्गीय (सर्वसाधारण) या प्रवर्गासाठी राखीव ठेवण्यात आला आहे. त्यामुळे जिल्हा परिषदेच्या एकूण सात गटांपैकी महिला आरक्षण असलेले चार गट असल्यामुळे तालुक्यात महिला नेतृत्वाचा प्रभाव वाढणार असल्याचे चित्र आहे.
दरम्यान, पंचायत समितीच्या चौदा गणांसाठी नव्याने आरक्षण सोडत काढण्यात आली. या सोडतीमध्ये अनुसूचित जातींची लोकसंख्या सर्वाधिक असलेल्या वडगाव रासाई गणामध्ये अनुसूचित जाती (SC) आरक्षण निश्चित करण्यात आले आहे. शिरूर तालुक्यात अनुसूचित जमाती (ST) लोकसंख्या प्रमाण कमी असल्याने यंदा कोणत्याही गणात अनुसूचित जमातीचे आरक्षण आलेले नाही. तर इतर मागासवर्गीय (OBC) समाजाची लोकसंख्या विचारात घेऊन एकूण तीन गणांमध्ये ओबीसी आरक्षण जाहीर करण्यात आले असून, त्यापैकी दोन जागा ओबीसी महिला आणि एक जागा ओबीसी सर्वसाधारण प्रवर्गात निश्चित करण्यात आली आहे.
आरक्षण सोडतीनंतर उरलेल्या दहा गणांपैकी पाच जागा सर्वसाधारण महिला प्रवर्गासाठी राखीव ठेवण्यात आल्या आहेत, तर पाच जागा सर्वसाधारण (खुल्या) प्रवर्गासाठी आहेत. पंचायत समितीच्या चौदा गणांचे आरक्षण पुढीलप्रमाणे आहे.
1.वडगाव रासाई(अनुसूचित जाती)
2.मांडवगण फराटा(ओबीसी महिला)
3.शिरूर ग्रामीण (ओबीसी महिला)
4.न्हावरे (सर्वसाधारण)
5.पाबळ (ओबीसी)
6.केंदूर (सर्वसाधारण महिला)
7.कवठे यमाई (सर्वसाधारण महिला)
8.टाकळी हाजी (ओबीसी महिला)
9.तळेगाव ढमढेरे(सर्वसाधारण महिला)
10.रांजणगाव सांडस (सर्वसाधारण)
11.शिक्रापूर (सर्वसाधारण)
12.सणसवाडी(सर्वसाधारण महिला)
13.रांजणगाव गणपती(सर्वसाधारण)
14.कारेगाव (सर्वसाधारण)
या नव्या आरक्षणामुळे शिरूर तालुक्यातील स्थानिक स्वराज्य संस्थांच्या आगामी निवडणुकांमध्ये नव्या समीकरणांना सुरुवात होणार असून, महिला उमेदवारांसाठी हे आरक्षण नवे दरवाजे उघडणारे ठरणार आहे. काही ठिकाणी महिला आरक्षणामुळे नव्या नेतृत्वाचा उदय होईल, तर काही ठिकाणी विद्यमान नेत्यांना आपला गण गमावल्यामुळे नाराजी व्यक्त करावी लागली. जिल्हा परिषद आणि पंचायत समितीच्या या आरक्षण सोडतीमुळे तालुक्यातील राजकीय वातावरणात चैतन्य निर्माण झाले असून, पुढील निवडणुकांसाठी सर्वच पक्षांनी आता आपापली रणनीती आखण्यास सुरुवात केली आहे.
