Pune Weather : पुणे: गेल्या काही दिवसांपासून पुणे शहरात किमान तापमानात चढ-उतार दिसून येत होते. त्यामुळे कधी ढगाळ वातावरण तर कधी कडक ऊन असे बदलते चित्र पाहायला मिळत होते. आता पुढील काही दिवस तापमानात हळूहळू वाढ होण्याची शक्यता हवामान विभागाने व्यक्त केली आहे.
आगामी 2 ते 3 दिवसांत किमान तापमान सुमारे 15 ते 16 अंश सेल्सिअस दरम्यान राहू शकते, तर कमाल तापमान 33 ते 34 अंश सेल्सिअसपर्यंत जाण्याचा अंदाज आहे. दुपारच्या वेळी उन्हाचा चटका अधिक जाणवू शकतो. आकाश प्रामुख्याने निरभ्र राहील आणि पावसाची शक्यता कमी आहे.
याआधी शहरात किमान तापमान 17 ते 18 अंश सेल्सिअस दरम्यान होते. मात्र रविवारी त्यात घट होऊन किमान तापमान 14.7 अंश सेल्सिअस इतके नोंदवले गेले. कमाल तापमानातही सुमारे 1 अंशाने घट होऊन ते 32 अंश सेल्सिअसवर आले. दुपारी कडक ऊन पडल्याने नागरिकांना उष्णतेचा त्रास सहन करावा लागला.
रविवार 1 तारखेपासून कमाल तापमान 34 अंश सेल्सिअसपर्यंत जाण्याची शक्यता असून किमान तापमान 16 अंश सेल्सिअस राहू शकते. त्यामुळे पुढील काही दिवस पुणेकरांना वाढत्या उष्णतेचा सामना करावा लागू शकतो. नागरिकांनी दुपारच्या वेळी बाहेर पडताना काळजी घ्यावी आणि पुरेसे पाणी पिण्याचा सल्ला देण्यात आला आहे.
