पुणे: पुणे जिल्ह्यातील शिरूर परिसरात होणाऱ्या (Pune Traffic Diversion) श्री शिवमहापुराण कथेच्या पार्श्वभूमीवर वाहतूक व्यवस्थेत मोठे बदल करण्यात आले आहेत. 24 फेब्रुवारी ते 2 मार्च 2026 या कालावधीत (Shirur News) दररोज सकाळी 10 ते सायंकाळी 6 या वेळेत शिरूर ते पाबळ रोडवरील वाहतूक पर्यायी मार्गाने वळवण्यात येणार आहे. या संदर्भातील आदेश जिल्हाधिकाऱ्यांनी जारी केले आहेत. (Latest Marathi News)
प. पु. पंडितजी प्रदीप मिश्रा यांच्या श्री शिवमहापुराण कथेचे आयोजन मौजे रामलिंग, रामलिंग रोड येथे करण्यात आले आहे. या कार्यक्रमासाठी राज्यासह इतर भागांतूनही मोठ्या संख्येने भाविक येण्याची शक्यता आहे. मागील काही धार्मिक कार्यक्रमांमध्ये झालेली प्रचंड गर्दी लक्षात घेता, यंदा प्रशासनाने आधीच नियोजनबद्ध पावले उचलली आहेत. वाहतूक कोंडी, आपत्कालीन सेवांना अडथळा आणि संभाव्य अपघात टाळणे हा या निर्णयामागील मुख्य उद्देश आहे.
पाबळ रोड व शिरूर रोडवरून रामलिंगकडे जाणारी वाहतूक अग्निशामक केंद्र चौकातून नवीन नगरपालिका रोडमार्गे जुना पुणे-अहिल्यानगर महामार्गावर वळवण्यात येईल. तेथून बरला आर्ट्स शेजारील बगाड रोड आणि बैलगाडा शर्यत घाट चौक मार्गे वाहनांना रामलिंगकडे जाता येईल. रामलिंगहून शिरूरकडे येणाऱ्या वाहनांसाठीही याच मार्गाचा वापर करण्यात येणार आहे.
भाविकांनी आपली वाहने निर्धारित वाहनतळावर उभी करावीत आणि कार्यक्रमस्थळी पायी जावे, असे आवाहन प्रशासनाने केले आहे. स्थानिक नागरिकांनी पर्यायी मार्गांचा वापर करून वेळेचे नियोजन करणे आवश्यक ठरणार आहे. धार्मिक उत्साहासोबत सुरक्षिततेची जबाबदारीही तितकीच महत्त्वाची असल्याने प्रशासन आणि नागरिक यांचा समन्वय या 7 दिवसांत निर्णायक ठरणार आहे.
