Pune News: पुणे : आजच्या काळात प्रामाणिकपणा दुर्मिळ होत चालला असताना कुंजीरवाडी येथे एका शाळकरी मुलीने दाखवलेला प्रामाणिकपणाचा आदर्श अनेकांसाठी प्रेरणादायी ठरला आहे. कुंजीरवाडी येथील कु. रुद्रा धुमाळ हिने रस्त्यावर सापडलेले साडे 3 तोळ्यांचे सोन्याचे मंगळसूत्र प्रामाणिकपणे मालकाच्या ताब्यात देत समाजासमोर आदर्श ठेवला आहे.
कुंजीरवाडी येथील सौ. प्रभावती धुमाळ या सकाळी नेहमीप्रमाणे पायी चालण्यासाठी बाहेर पडल्या होत्या. चालताना त्यांच्या गळ्यातील सोन्याचे मंगळसूत्र नकळत निसटून रस्त्यावर पडले. घरी आल्यानंतर ही बाब लक्षात आल्यानंतर कुटुंबीयांनी परिसरात शोधाशोध सुरू केली. त्यांचा मुलगा रस्त्यावर मंगळसूत्र शोधत असताना काही शाळकरी मुली त्यांना भेटल्या. त्यावेळी कु. रुद्रा धुमाळ हिने आपणास रस्त्यावर सोन्याचे मंगळसूत्र सापडल्याचे सांगितले आणि कोणतीही अपेक्षा न ठेवता ते प्रामाणिकपणे परत केले. तिला देऊ केलेल्या खाऊच्या पैशांचा स्वीकार करण्यासही तिने नम्रपणे नकार दिला.
या प्रामाणिक कृतीची दखल घेत धुमाळ कुटुंबीय आणि स्व. विलास बापू तुपे फाऊंडेशन यांच्या वतीने ग्रामीण सर्वांगीण विकास विद्यालयात छोटेखानी सन्मान कार्यक्रमाचे आयोजन करण्यात आले. या कार्यक्रमात कु. रुद्रा हिचा सत्कार करण्यात आला. यावेळी तिचे वर्गशिक्षक आणि मुख्याध्यापक यांचाही गौरव करण्यात आला. उपस्थितांनी रुद्रा हिच्या प्रामाणिकपणाचे तसेच तिच्या कुटुंबातील आणि शाळेतील संस्कारक्षम वातावरणाचे कौतुक केले.
या कार्यक्रमास धुमाळ कुटुंबीय, रुद्रा हिचे कुटुंब, स्थानिक मान्यवर, शाळेचे पदाधिकारी, शिक्षकवृंद तसेच सामाजिक कार्यकर्ते मोठ्या संख्येने उपस्थित होते.
दरम्यान, सामाजिक कार्यकर्ते विकास धुमाळ यांच्या संकल्पनेतून शाळेच्या प्रांगणात गावठी सोनचाफ्याची दोन झाडे लावण्यात आली. या झाडांना “प्रामाणिकपणाचे झाड” असे नाव देण्यात आले. हा उपक्रम इतर विद्यार्थ्यांनाही प्रामाणिकपणाची प्रेरणा देणारा ठरेल, अशी भावना उपस्थितांनी व्यक्त केली.
