उरुळी कांचन (पुणे) : पुणे-सोलापूर महामार्गावर उरुळी कांचन ग्रामपंचायत हद्दीत चालकाला अचानक हृदयविकाराचा झटका आल्याने चारचाकीवरील ताबा सुटून झालेल्या अपघातात चालकाचा जागीच मृत्यू झाला आहे. तर याच कारमधील दोन महिला गंभीर जखमी झाल्या असून, एकाची प्रकृती चिंताजनक असल्याची माहिती मिळत आहे. हा अपघात आज बुधवारी (ता. 14) सकाळी 6 वाजून 40 मिनिटांच्या सुमारास घडला.
मिळालेल्या प्राथमिक माहितीनुसार, मारुती अर्टिगा ही चारचाकी गाडी पुण्याच्या बाजूकडून सोलापूरच्या दिशेने निघाली होती. गाडी उरुळी कांचन येथील कस्तुरी एंपायर शेजारील ‘हरणा कॉम्प्लेक्स’ समोर आली असताना, चालकाला अचानक तीव्र हृदयविकाराचा झटका आला. त्यामुळे चालकाचा गाडीवरील ताब सुटला आणि सुसाट असलेली कार थेट सेवा रस्त्याच्या बाजूला असलेल्या लोखंडी जाळ्यांवर जाऊन जोरदार आदळली. अशी माहिती मिळत आहे. हा अपघात इतका भीषण होता की, चालकाचा जागीच मृत्यू झाला.
प्रमोद प्रकाश महंत (वय – 30, रा. अक्कलकोट, जि. सोलापूर) असे अपघातात मृत्यू झालेल्या चालकाचे नाव आहे. तर मंगल शरद धार (वय-42, रा. शिंदवणे, ता. हवेली) असे गंभीर जखमी झालेल्या महिलेचे नाव आहे. तिच्यावर उरुळी कांचन येथील सिद्धिविनायक रुग्णालयात उपचार सुरु आहेत.
या अपघातात कारमधील दोन महिला गंभीर जखमी झाल्या असून, त्यांच्यावर खासगी रुग्णालयात उपचार सुरू आहेत. यातील एका महिलेची प्रकृती अत्यंत गंभीर असल्याचे सांगण्यात येत आहे. मयत चालक व जखमी महिलांची नावे अद्याप समजू शकलेली नाहीत.
अपघाताची माहिती मिळताच कस्तुरी प्रतिष्ठानच्या रुग्णवाहिकेचे चालक संतोष झोंबडे आणि माऊली लाड यांनी घटनास्थळी धाव घेतली. त्यांनी दोन्ही गंभीर जखमी महिलांना तत्काळ उरुळी कांचन येथील सिद्धिविनायक हॉस्पिटलमध्ये उपचारासाठी दाखल केले. त्यांच्या या वेळेवर मदतीमुळे जखमी महिलांना तातडीने वैद्यकीय उपचार मिळण्यास मदत झाली. उरुळी कांचन पोलिसांकडून पुढील कार्यवाही सुरू आहे. दरम्यान, अपघाताचे नक्की कारण आद्यप समजू शकले नसून पोलिसांकडून माहिती घेण्याचे काम सुरू झाले आहे.
