पुणे: ज्या घरात सुखी संसाराची स्वप्ने पाहिली, त्याच चार भिंतीत (Pune News) छळ होतो, तेव्हा जगण्यातील उमेद कशी संपते, याचा भीषण प्रत्यय पुण्यातील बिबवेवाडी भागात आला आहे. सासरच्या मंडळींकडून होणाऱ्या अतोनात शारीरिक आणि मानसिक जाचाला कंटाळून 33 वर्षीय सुवर्णा सर्जेराव जाधव या तरुण विवाहितेने गळफास घेऊन आपली जीवनयात्रा संपवली. या घटनेने केवळ बिबवेवाडीच नव्हे, तर संपूर्ण पुणे शहर सुन्न झाले आहे.
सुवर्णा यांचा विवाह सर्जेराव जाधव (38) यांच्याशी झाला होता. लग्नानंतर काही काळ सर्व काही सुरळीत वाटत असतानाच, सासरच्या मंडळींचे खरे रूप समोर आले. सुवर्णा यांनी सर्व काही नीट व्हाव म्हणून अनेकदा तडजोड केली, मात्र सासरच्यांची निष्ठुरता कमी झाली नाही.
गेल्या अनेक दिवसांपासून हा छळ असह्य झाला होता. पती सर्जेराव याने पत्नीची बाजू घेण्याऐवजी छळ करणाऱ्या नातेवाईकांनाच साथ दिल्याचे प्राथमिक तपासात समोर आले आहे. सासरच्या सात नातेवाईकांनी मिळून सुवर्णा यांचे जगणे मुश्किल केले होते. अखेर, सततचा अपमान आणि न थांबणाऱ्या त्रासापुढे हार मानून, त्यांनी राहत्या घरी मृत्यूला कवटाळले.
बिबवेवाडी पोलिसांनी तातडीने तपास करत सुवर्णा यांच्या पतीसह सासरच्या सात जणांना बेड्या ठोकल्या आहेत. यामध्ये सासरे माणिकभाऊ जाधव (70), सासू जयश्री (65) यांच्यासह इतर नातेवाईकांचा समावेश आहे.
