पुणे: हडपसर परिसरात बुलेटच्या (Pune News) सायलेंसरमध्ये फेरफार करून फटाक्यांसारखे कर्कश आवाज काढणाऱ्या दुचाकीस्वारांविरोधात पोलिसांनी (Hadapsar News) कारवाई करत धडाका दिला आहे. ससाणेनगर–काळेपडळ परिसरात भरधाव वेगाने धावणाऱ्या दोन बुलेटस्वारांना पोलिसांनी ताब्यात घेत मोटार वाहन कायद्यान्वये गुन्हा दाखल केला आहे. (Latest Marathi News)
सध्या शहरातील अनेक भागांमध्ये बुलेटच्या सायलेंसरमध्ये बदल करून जाणीवपूर्वक मोठे आवाज काढण्याचे प्रकार वाढले आहेत. रात्री-अपरात्री किंवा वर्दळीच्या रस्त्यांवर असे आवाज केल्याने नागरिक त्रस्त होत असून विशेषतः ज्येष्ठ नागरिक, लहान मुले आणि रुग्णांना मोठा त्रास सहन करावा लागत आहे.
काळेपडळ पोलीस ठाण्याचे पोलीस हवालदार श्रीकृष्ण खोकले यांनी दिलेल्या माहितीनुसार, दोघे आरोपी बुलेटच्या सायलेंसरमध्ये बेकायदेशीर फेरफार करून फटाक्यांसारखे स्फोटक आवाज काढत भरधाव वेगाने परिसरातून जात होते. पोलिसांनी त्यांना थांबवून चौकशी केली असता त्यांच्याकडे वाहनचालक परवाना तसेच दुचाकीची कोणतीही वैध कागदपत्रे नसल्याचे निष्पन्न झाले.
त्यानंतर पोलिसांनी दोघांविरुद्ध मोटार वाहन कायद्यानुसार गुन्हा दाखल करत नोटीस बजावली आहे. सायलेंसरमध्ये फेरफार करून सार्वजनिक ठिकाणी मोठा आवाज निर्माण करणे हा कायद्याने दंडनीय गुन्हा असून अशा वाहनांवर कठोर कारवाई केली जाणार असल्याचा इशाराही पोलिसांनी दिला आहे.
यापूर्वीही हडपसर आणि परिसरात अशा प्रकारच्या बुलेटस्वारांवर कारवाई करण्यात आली असून जप्त केलेले सायलेंसर नष्ट करण्यात आले होते. मात्र तरीही काही तरुण फॅशन आणि स्टंटच्या नावाखाली नियम धाब्यावर बसवताना दिसत आहेत.
पोलीस प्रशासनाने नागरिकांना आवाहन केलं आहे की, अशा कर्कश आवाज करणाऱ्या वाहनांची माहिती तात्काळ पोलिसांना द्यावी. रस्त्यावर सुरक्षित आणि शांत वातावरण राखणं ही प्रत्येकाची जबाबदारी आहे, आणि नियम तोडणाऱ्यांवर यापुढेही कठोर कारवाई सुरूच राहणार आहे.
