हडपसर, (पुणे) ; पुणे-दौंड रेल्वे मार्गावरून प्रवास करणाऱ्या पुणे-दौंड डेमो (DEMU) गाडी नंबर ७१४०७ या रेल्वे गाडीत दररोज दुपारी हडपसर रेल्वे स्थानकातून काही टगे आणि मद्यपी प्रवासी डब्यात घुसून दारू पिऊन धिंगाणा घालत आहेत, तर काही जण थेट महिला प्रवाशांच्या समोरच जुगाराचा डाव मांडत असल्याचा धक्कादायक प्रकार उघडकीस आला आहे. या संपूर्ण प्रकाराचा एक व्हिडिओ ‘पुणे प्राईम न्यूज’ च्या हाती लागला असून, यामुळे रेल्वेतील महिलांची सुरक्षा पूर्णपणे वाऱ्यावर गेल्याचे चित्र पाहायला मिळत आहे.
मिळालेल्या माहितीनुसार, पुणे-दौंड डेमो गाडी नंबर ७१४०७ ही गाडी दररोज दुपारी तीन वाजण्याच्या सुमारास धावत असताना हा प्रकार घडतो. हडपसर रेल्वे स्टेशनवरून काही बेजबाबदार नागरिक या गाडीत चढतात. यातील काही जण भरदिवसा रेल्वेच्या डब्यातच दारू पिऊन जागा अडवून झोपतात. तर काही जणडब्यात प्रवास करणाऱ्या महिला प्रवाशांच्या समोरच जुगार खेळ सुरू करतात. भरदिवसा चालत्या रेल्वेत सुरू असलेल्या या बेकायदेशीर कृत्यांमुळे महिला प्रवाशांना मानसिक त्रासाला सामोरे जावे लागत आहे. या मद्यपी आणि जुगारांमुळे डब्यात कधीही मोठी दुर्घटना किंवा धोका निर्माण होऊ शकतो.
रेल्वे प्रशासनाचे या गंभीर प्रकाराकडे पूर्णपणे दुर्लक्ष होत असल्याचे पाहून, दौंड-पुणे प्रवासी संघाचे सदस्य सचिन लोंढे यांनी थेट पुराव्यांसह रेल्वे प्रशासनाकडे या बेकायदेशीर कृत्यांविरोधात आणि सुरक्षा व्यवस्थेबाबत तक्रार दाखल केली आहे. रेल्वे डब्यात दररोज आरपीएफ किंवा लोहमार्ग पोलिसांची कडक गस्त असणे गरजेचे असताना, पोलीस नेमके कुठे गायब असतात? असा सवाल आता प्रवासी संघाच्या वतीने उपस्थित केला जात आहे.
दरम्यान, या तक्रारीनंतर रेल्वे प्रशासन त्या जुगारी आणि मद्यपींवर कारवाई करणार का की नेहमीप्रमाणे डोळेझाक करणार? याकडे संपूर्ण रेल्वे प्रवाशांचे लक्ष लागले आहे.
