पुणे: पुणे जिल्ह्यात प्रशासन अधिक प्रभावी आणि नागरिकाभिमुख करण्याच्या दृष्टीने बारामती येथे स्वतंत्र अपर जिल्हाधिकारी कार्यालय सुरू करण्याचा प्रस्ताव पुढे आला आहे. या प्रस्तावाबाबत नागरिकांनी आपल्या हरकती आणि सूचना 8 जुलै 2026 पर्यंत जिल्हाधिकारी कार्यालयाकडे सादर कराव्यात, असे आवाहन जिल्हाधिकारी जितेंद्र डुडी यांनी केले आहे.
महसूल व वन विभागाच्या आदेशानुसार बारामती येथे प्रस्तावित अपर जिल्हाधिकारी कार्यालय स्थापन करण्याची प्रक्रिया सुरू आहे. या कार्यालयाच्या कार्यक्षेत्रात बारामती, इंदापूर आणि दौंड या तीन महत्त्वाच्या तालुक्यांचा समावेश करण्यात येणार आहे. त्यामुळे या भागातील नागरिकांना अनेक प्रशासकीय कामांसाठी पुण्यापर्यंत येण्याची गरज कमी होणार असून विविध महसुली कामे अधिक वेगाने होण्याची अपेक्षा व्यक्त केली जात आहे.
दरम्यान, पुणे जिल्हाधिकारी कार्यालयाच्या कार्यक्षेत्रात पुणे शहरासह आंबेगाव, खेड, मावळ, मुळशी, हवेली, शिरूर, पुरंदर, जुन्नर, भोर आणि राजगड या तालुक्यांचा समावेश कायम राहणार आहे. पुणे जिल्ह्यात एकूण 14 तालुके असून प्रशासकीय कामकाज अधिक सुलभ करण्यासाठी हा बदल प्रस्तावित करण्यात आला आहे.
राज्य शासनाने या प्रस्तावावर अंतिम निर्णय घेण्यापूर्वी नागरिकांची मते जाणून घेण्याचा निर्णय घेतला आहे. त्यामुळे संबंधित तालुक्यातील नागरिक, लोकप्रतिनिधी, सामाजिक संस्था तसेच विविध संघटनांनी आपले मत लेखी स्वरूपात जिल्हाधिकारी कार्यालयाकडे सादर करावे, असे प्रशासनाने स्पष्ट केले आहे.
बारामती येथे अपर जिल्हाधिकारी कार्यालय सुरू झाल्यास स्थानिक पातळीवर प्रशासकीय सेवा उपलब्ध होतील, निर्णय प्रक्रिया गतिमान होईल आणि नागरिकांचा वेळ तसेच खर्चही वाचेल, अशी अपेक्षा व्यक्त केली जात आहे. आता या प्रस्तावावर नागरिकांकडून कोणत्या सूचना आणि हरकती येतात, याकडे सर्वांचे लक्ष लागले आहे.
