पुणे: कोंढवा परिसरात मैत्रीच्या नात्यावर प्रश्नचिन्ह निर्माण करणारी घटना समोर आली आहे. विश्वासू मित्र म्हणून घरात आलेल्या तरुणानेच मैत्रिणीच्या अनुपस्थितीचा फायदा घेत लाखो रुपयांचे दागिने आणि रोख रक्कम चोरल्याचा आरोप करण्यात आला आहे. या प्रकरणी कोंढवा पोलीस ठाण्यात गुन्हा दाखल करण्यात आला असून आरोपीचा शोध सुरू आहे.
पोलिसांनी दिलेल्या माहितीनुसार, ही घटना 25 जून रोजी रात्री 9 ते 10 वाजण्याच्या दरम्यान घडली. तक्रारदार 25 वर्षीय तरुणी आणि आरोपी यांची चांगली ओळख होती. त्या दिवशी आरोपी तिच्या घरी आला होता. दोघे काही वेळ गप्पा मारत बसले होते. त्याचवेळी तरुणीला जवळच राहणाऱ्या मावशीकडे जेवणाचा डबा देण्यासाठी जावे लागले. मित्र घरात असल्याने ती काही मिनिटांसाठी बाहेर पडली.
तरुणी घराबाहेर गेल्यानंतर आरोपीने संधी साधली आणि सोन्याचे दागिने आणि रोख रक्कम घेतली. या चोरीत एकूण 6 लाख 24 हजार रुपयांचा ऐवज लंपास झाल्याचे तक्रारीत नमूद करण्यात आले आहे.
घरात दागिने आणि पैसे गायब असल्याचे तिच्या लक्षात आल्याने त्या वेळी घरात दुसरे कोणीही नसल्याने संशय थेट मित्रावर गेला. जवळच्या व्यक्तीनेच विश्वासघात केल्याचे समजताच तिला मोठा धक्का बसला. यानंतर तिने तातडीने कोंढवा पोलीस ठाण्यात जाऊन तक्रार दाखल केली. पोलिसांनी चोरीचा गुन्हा नोंदवून तपास सुरू केला आहे.
