लोणी काळभोर, ता. 24: सोन्याचे दागिने देण्याचे आमिष दाखवून 1 लाख 60 हजार रुपयांची फसवणूक केल्याप्रकरणी लोणंद पोलिसांनी लोणी काळभोर(ता. हवेली) येथील एका अट्टल गुन्हेगाराला अटक केली आहे. पोलिसांच्या तपासात आरोपीविरुद्ध महाराष्ट्रातील विविध पोलीस ठाण्यांत चोरी, घरफोडी आणि फसवणुकीचे तब्बल 109 गुन्हे दाखल असल्याची माहिती समोर आली आहे
जाफर शाहजमान इराणी (वय 45) असे अटक करण्यात आलेल्या गुन्हेगाराचे नाव आहे. पोलिसांनी दिलेल्या माहितीनुसार, लोणंद येथील भैरवनाथ गल्ली परिसरात सोन्याचे दागिने देण्याचे आमिष दाखवून फसवणूक केल्याची तक्रार लोणंद पोलिस ठाण्यात दाखल झाली होती. संशयित आरोपीने फिर्यादीचा विश्वास संपादन करून सोन्याचे गंडे देण्याचे भासवले. मात्र, प्रत्यक्षात सोन्याऐवजी अन्य धातूचा वापर करून फसवणूक केल्याचे फिर्यादीत नमूद करण्यात आले आहे. या प्रकरणाचा तपास करताना पोलिसांनी जाफर इराणी याला अटक केली.
इराणी याच्याविरुद्ध पुणे शहर व जिल्ह्यासह कराड, बारामती, यवत, वाकड आणि हडपसर आदी ठिकाणी 2010 ते 2025 या कालावधीत विविध गुन्ह्यांची नोंद आहे. अटकेनंतर त्याला न्यायालयात हजर करण्यात आले असून, पुढील तपास सुरू आहे.
ही कारवाई पोलीस अधीक्षक निखिल पिंगळे, अपर पोलीस अधीक्षक वैशाली कडुकर आणि उपविभागीय पोलीस अधिकारी धन्यकुमार गोडसे यांच्या मार्गदर्शनाखाली सहायक पोलीस निरीक्षक शिवाजी जायपत्रे, उपनिरीक्षक विशाल जगताप आणि त्यांच्या पथकाने केली.
