लोणी काळभोर, ता. 18 : मांजरी बुद्रुक परिसरातील घुले नगर येथे राहणारा 17 वर्षीय मुलगा घरातून बेपत्ता झाल्याची घटना समोर आली आहे. मुलाच्या आईने दिलेल्या तक्रारीवरून मांजरी पोलिस ठाण्यात अज्ञात व्यक्तीविरुद्ध तक्रार नोंदविण्यात आली असून, मुलाचा शोध सुरू आहे.
पोलिसांनी दिलेल्या माहितीनुसार, संबंधित मुलगा खराडी येथील एका महाविद्यालयात बारावीचे शिक्षण घेत आहे. 16 सप्टेंबर रोजी सकाळी त्याच्या पोटात दुखत असल्याने त्याने महाविद्यालयात जाणार नसल्याचे आईला सांगितले होते. त्यामुळे आईने त्याला घरीच आराम करण्यास सांगितले.
यानंतर मुलाची आई नेहमीप्रमाणे सकाळी सुमारे 9 वाजता मांजरी येथील शाळेत शिक्षिकेच्या नोकरीसाठी गेली. सायंकाळी साडेपाचच्या सुमारास घरी परतल्यानंतर मुलगा घरात दिसला नाही. त्यानंतर आईने परिसरात तसेच मुलाच्या मित्रांकडे चौकशी केली; मात्र त्याचा ठावठिकाणा लागला नाही. मुलगा बराच वेळ शोधूनही सापडत नसल्याने कोणीतरी अज्ञात व्यक्तीने फूस लावून त्याला पळवून नेले असावे, अशी शंका आईने व्यक्त केली आहे. त्यानुसार तिने पोलिसांकडे तक्रार दाखल केली आहे.
बेपत्ता मुलाची उंची सुमारे 5 फूट 8 इंच असून, बांधा सडपातळ आणि रंग सावळा आहे. बेपत्ता होताना त्याने काळ्या रंगाची ट्रॅक पँट व काळ्या रंगाचा टी-शर्ट परिधान केला होता. तो हिंदी, इंग्रजी आणि तेलुगू भाषा बोलतो. त्याच्याकडे रेडमी कंपनीचा मोबाईल असल्याचे तक्रारीत नमूद करण्यात आले आहे. याप्रकरणी पोलिसांनी अज्ञात व्यक्तीविरुद्ध तक्रार नोंदवून मुलाचा शोध सुरू केला आहे.
