मुंबई: मोहरमच्या मिरवणुकीत विषारी कॅप्सूल वाटप करून मोठा घातपात घडवून आणण्याचा संशय असलेल्या प्रकरणाचा तपास मुंबई पोलीस वेगाने करत आहेत. या प्रकरणात फैयाज निसार हुसेन प्रेमजी या व्यक्तीला अटक करण्यात आली असून त्याच्याकडून जवळपास 14,900 संशयित विषारी कॅप्सूल जप्त करण्यात आल्याची माहिती समोर आली आहे. पोलिसांच्या तातडीच्या कारवाईमुळे मोठी जीवितहानी टळल्याचे सांगितले जात आहे.
या प्रकरणाचा उलगडा एका महिलेच्या सतर्कतेमुळे झाला. मिरवणुकीदरम्यान काही जणांकडून “आरोग्यासाठी फायदेशीर गोळी” किंवा “इम्युनिटी वाढवणारी कॅप्सूल” असे सांगत लोकांना गोळ्या दिल्या जात होत्या. मात्र, एका महिलेने संशय आल्याने कॅप्सूल उघडून पाहिली. तिच्यामध्ये असलेली करड्या रंगाची पावडर पाहून तिने तातडीने याबाबत माहिती दिली. पुढील तपासात हा पदार्थ झिंक फॉस्फाईड असल्याचा संशय व्यक्त करण्यात आला.
या कॅप्सूलचे सेवन केलेल्या काही नागरिकांची प्रकृती बिघडल्याची माहिती आहे. त्यांना उपचारासाठी रुग्णालयात दाखल करण्यात आले असून काहींवर अजूनही उपचार सुरू आहेत. या घटनेनंतर मुंबई पोलिसांनी तपासाची सूत्रे हाती घेत आरोपीला ताब्यात घेतले आणि पुढील चौकशी सुरू केली.
तपासादरम्यान आणखी काही धक्कादायक बाबी समोर आल्या आहेत. संशयिताने विषारी रसायनाचा मानवी शरीरावर होणारा परिणाम समजून घेण्यासाठी इंटरनेट, Google आणि AI आधारित साधनांचा वापर केला होता. तसेच या संपूर्ण प्रकारासाठी आधीपासून नियोजन केले होते. मात्र, याबाबतची अधिकृत पुष्टीसाठी अधिक तपास सुरु आहे.
