पुणे: पुण्यातील पर्वती दर्शन परिसरातून एक अत्यंत दुर्दैवी बातमी समोर आली आहे, जिथे आईच्या निधनाचे तीव्र दुःख सहन न झाल्याने एका २५ वर्षीय मुलाने स्वतःचे जीवन संपवल्याची धक्कादायक घटना घडली आहे. मंदा दोडके (वय ५०) आणि साहिल गणेश दोडके (वय २५) अशी या मायलेकाची नावे आहेत. या घटनेने संपूर्ण परिसरात मोठी शोककळा पसरली असून, सर्वांचे डोळे पाणावले आहेत.
मूळचे दांडेकर पूल येथील रहिवासी असलेले दोडके कुटुंब, काही काळापूर्वीच पुनर्वसन प्रकल्पामुळे पर्वती दर्शन परिसरात भाड्याने स्थायिक झाले होते. मंदा दोडके या रुग्णांची सेवा करण्याचे काम करून संसाराला हातभार लावत असत, तर साहिल हा त्यांचा एकुलता एक मुलगा होता.
गुरुवारी पहाटे मंदा दोडके यांना अचानक अर्धांगवायूचा झटका आला. साहिलने त्यांना ससून रुग्णालयात उपचारासाठी नेले. आई लवकर बरी व्हावी म्हणून तो सतत देवाकडे प्रार्थना करत होता. मात्र, नियतीचे चक्र वेगळेच होते. साहिल जेव्हा आईसाठी चहा घेऊन रुग्णालयात पोहोचला, तेव्हा डॉक्टरांनी त्याला आईच्या निधनाची दुर्दैवी बातमी दिली.
आईचे निधन झाल्याचे कळताच आईशिवाय जगण्याची कल्पनाही न करू शकणाऱ्या साहिलने रुग्णालयातून थेट घरी धाव घेतली आणि टोकाचे पाऊल उचलत गळफास घेतला. दरम्यान, आज या माय-लेकावर एकाच वेळी अंत्यसंस्कार करण्याची वेळ त्यांच्या नातेवाईकांवर आली आहे. साहिलचे आईवरील प्रेम आणि तिच्या निधनानंतर त्याने घेतलेला हा निर्णय उपस्थितांच्या काळजाला पीळ घालणारा आहे.
