लोणी काळभोर : शहरात अमली पदार्थांच्या वाढत्या विक्रीविरोधात सुरू (Loni Kalbhor News) असलेल्या मोहिमेत लोणीकाळभोर पोलिसांनी मोठी कारवाई करत गांजा विक्री करणाऱ्या सराईत आरोपीला 2 वर्षांसाठी पुणे शहर व पुणे ग्रामीण हद्दीतून तडीपार केले आहे. ही कारवाई पुणे शहर पोलीस आयुक्त अमितेश कुमार यांच्या मार्गदर्शनाखाली करण्यात आली.
पोलीस आयुक्त अमितेश कुमार यांनी ड्रग्स, गांजा आणि इतर अमली पदार्थ विक्री करणाऱ्यांविरोधात कठोर आणि परिणामकारक कारवाईचे आदेश दिले होते. त्यानुसार लोणीकाळभोर पोलिस ठाण्याच्या हद्दीत गांजा विक्री करणाऱ्या रेकॉर्डवरील आरोपी आकाश संतोष भाले, वय 23 वर्षे, रा. गाडेवस्ती, लोणीकाळभोर, ता. हवेली, जि. पुणे याच्यावर तडीपारीची कारवाई करण्यात आली.
आकाश भाले याच्याविरोधात यापूर्वी अमली पदार्थ विक्रीप्रकरणी गुन्हे नोंद असून, त्याच्यासोबत त्याची आई मंगल संतोष भाले, वय 26 वर्षे, हिच्यावरही गांजा विक्रीसंदर्भात कारवाई करण्यात आली होती. आरोपींच्या कारवायांमुळे परिसरातील सामान्य नागरिक, विशेषत: महाविद्यालयीन विद्यार्थी व्यसनाच्या आहारी जाऊन आर्थिक व सामाजिक नुकसान होत असल्याची माहिती पोलिस तपासात समोर आली होती. त्यामुळे वरिष्ठ पोलिस निरीक्षक राजेंद्र पळके यांनी विशेष प्रस्ताव तयार करून आरोपीविरुद्ध तडीपारीची कार्यवाही करण्याबाबत उपायुक्तांकडे सादर केला होता.
पोलीस उपायुक्त परिमंडळ 6, मा. डॉ. राजकुमार शिंदे यांनी प्रकरणाचा आढावा घेत आरोपी आकाश संतोष भाले व मंगल संतोष भाले यांना 2 वर्षांसाठी तडीपार करण्याचे आदेश दिले आहेत.
ही कारवाई सहायक पोलीस आयुक्त, वानवडी विभाग मा. अनुराधा उदळे यांच्या मार्गदर्शनाखाली करण्यात आली. प्रत्यक्ष कारवाईत वरिष्ठ पोलीस निरीक्षक राजेंद्र पळके, पोलीस निरीक्षक (गुन्हे) सिता पाटील, पोलीस उपनिरीक्षक प्रल्हाद जगताप, पोलीस हवालदार सुनील नागाळे, पो.हवा. तेज भोसले, पोलीस अंमलदार प्रशांत नरसळे, दीपक सोनवणे तसेच महिला पोलीस अंमलदार योगिता भोसले यांनी सहभाग घेतला. लोणीकाळभोर पोलिसांच्या या कारवाईमुळे परिसरातील अमली पदार्थांच्या अवैध धंद्यांना मोठा आळा बसण्याची अपेक्षा व्यक्त केली जात आहे.
