लोणी काळभोर, ता.25: आरपीआयची महिला नेता असल्याची धमकी देऊन व्यवसायिकाच्या 2 गुंठे जमिनीवर ताबा ठोकून हडपण्याची घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील गट क्रमांक 1693 मध्ये बुधवारी (ता.24) दुपारी अडीज ते साडेचार या दरम्यान घडली आहे. या घटनेमुळे लोणी काळभोर (Loni Kalbhor Crime) परिसरात एकच खळबळ उडाली असून तीन जणांच्या विरोधात विविध कलमान्वये गुन्हा दाखल करण्यात आला आहे.
रुपाली महादेव काळभोर, अशोक आणाराव सुर्यवंशी व प्रितम सावंत (सर्व राहणार, लोणी काळभोर ता हवेली जि पुणे) अशी गुन्हा दाखल करण्यात आलेल्या आरोपींची नावे आहेत. याप्रकरणी हजीलाल शब्बीर शेख (वय 45 रा. मंत्रिमार्केट हडपसर पुणे) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी हजीलाल शेख व त्यांच्या सहकाऱ्यांनी भाऊसाहेब फुले यांच्याकडून सन 2019 मध्ये जमीन खरेदी केलेली आहे. या जमीनीची क प्रत तयार करुन सदर जमीनीला सिमेंटचे कंम्पाऊन्ड केले आहे. ही जमीन मागील सात वर्षापासून शेख यांच्या ताब्यात आहे.
दरम्यान, रुपाली काळभोर, अशोक सुर्यवंशी व प्रितम सावंत हे बुधवारी दुपारी पावणे तीन वाजण्याच्या सुमारास फिर्यादी हजीलाल शेख यांच्या जमिनीजवळ आले. आणि शेख यांना शिवीगाळ करुन हि गायरान जमीन आहे. तुम्ही परत येथे पाय ठेवायचा नाही. तुम्ही पुन्हा जर या ठिकणी आलात तर मी तुमच्या विरुध्द खोटा नाटा गुन्हा दाखल करेल व तुम्हाला आडकवेल. मी आरपीआयची खुप मोठी नेता आहे असे म्हणुन धमकी दिली. तसेच फिर्यादी हजीलाल शेख यांच्या जमिनीत वरील तिघांनी अतिक्रमण करण्याचा प्रयत्न केला आहे.
याप्रकरणी हजीलाल शेख यांनी लोणी काळभोर पोलीस ठाण्यात फिर्याद दिली आहे. त्यानुसार वरील तिघांच्या विरोधात भारतीय न्याय संहीता कायदा कलम 329(3), 351 (2), 352, 3(5) प्रमाणे गुन्हा दाखल करण्यात आला आहे.
पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक पूजा माळी करत आहेत.
