Loni Kalbhor : बनावट सोने तारण ठेवून नवरा बायकोने मैग फायनान्स गोल्ड लोन या कंपनीला 1 लाख रुपयांची फसवणूक केली आहे. ही घटना कदमवाकवस्ती (ता. हवेली) ग्रामपंचायत हद्दीतील मैग फिनजवे व कंपनी येथे 1 मार्च 2024 रोजी दुपारी साडेबारा वाजण्याच्या सुमारास घडली आहे. लोणी काळभोर पोलीस ठाण्यात दोघांच्या विरोधात गुन्हा दाखल करण्यात आला आहे. (Loni Kalbhor)
अम्रिन राजु शेख व तिचा पती राजु शेख (पुर्ण नाव नाही, दोघेही रा.लाईट डि पी जवळ, गल्ली नंबर १४, सर्वे नंबर 933, सय्यदनगर, पुणे) अशी गुन्हा दाखल करण्यात आलेल्या आरोपींची नावे आहेत. याप्रकरणी नारायण भिमराव पंडीत (वय-34, रा.मु.पो. घांटग्रा ता. गंगाखेड जि.परभणी सध्या रा.श्री सिध्दीविनायक पार्क, वडकी ता.हवेली जि. पुणे) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी नारायण पंडीत हे कदमवाकवस्ती (ता. हवेली) येथील मॅग फिनजर्वे व कंपनी येथे व्यवस्थापक म्हणून काम करतात. ते नोकरीतून मिळणाऱ्या पगारीतुन कुटुंबाचा उदरनिर्वाह चालवितात. मॅग फिनजर्व व कंपनी हि सोनेतारण लोन करते. कंपनीमध्ये सोनेतारण ठेवून लोकांना लोन दिले जाते. कंपनीमध्ये काम करणारे लोकांना कंपनीमध्ये नोकरीस घेण्याचे अगोदर सोने पारख करण्याचे प्रशिक्षण दिले जाते. लोकांना सोने तारण ठेवुन लोन देण्याचे अगोदर लोकांकडुन तारण ठेवण्यात येणारे सोन्याची पारख करुन त्याची तपासणी केली जाते.
तपासणीनंतर सोने खरे असल्याची खात्री पटल्यानंतर त्याचे वजन व मुल्यांकन करून तारण ठेवले जाते. तारण ठेवणाऱ्या लोकांकडून त्यांचे आधारकार्ड, पैनकार्ड व बँकेचे पासबुक अथवा चेक घेवुन सर्व कागदपत्रांची पुर्तता झाल्यानंतरच कंपनी त्यावर लोन देत असते. मॅग फिनजर्वे व कंपनीमध्ये अम्रिन व राजु शेख हे जोडपे एक सोन्याचे कडे तारण ठेवण्याकरीता आले होते. घरामध्ये आर्थिक अडचण असुन पैशांची खुप गरज असल्याचे त्यांनी सांगितले होते. त्यांच्याजवळ असलेल्या सोन्याच्या कड्याची पाहणी करुन कंपनीने सोने पारख करण्याचे दिलेल्या प्रशिक्षणावरुन स्टोनवर सदर सोन्याचे कडे घासले.
त्यानंतर अॉसिड व मिठ पाणी टाकुन चेक केले असता, सदर दागिना हा प्रथमदर्शनी सोन्याचा असल्याची खात्री झाली. त्यानंतर त्यांना 1 लाख 90 हजार सोने तारण कर्ज देण्यात आले. परंतु, त्याची तपासणी केली असता, ४०.७४ ग्रॅम ऐवढे वजनाचे कड्यास सोन्याचा मुलामा दिलेली बनावट सोने असल्याचे समोर आले. दोन्ही आरोपींनी लोन घेवुन ते न फेडता सदर रक्कम स्वताच्या आर्थिक फायद्याकरिता वापरली आहे. दोघांनी कर्ज फेड न करता नकली सोने देऊन कंपनीची फसवणुक केली आहे. अशी तक्रार नारायण पंडीत यांनी लोणी काळभोर पोलीस ठाण्यात दिली आहे. पुढील तपास लोणी काळभोर पोलीस ठाण्याचे पोलीस उपनिरीक्षक सर्जेराव बोबडे करत आहेत.
