Khed News : पुणे जिल्ह्यातील खेड तालुक्यातील गाडकवाडी येथे थकीत वीज बिल वसुलीच्या मोहिमेवर असलेल्या महावितरणच्या वायरमनला दोन भावांनी भररस्त्यात बेदम मारहाण केल्याची संतापजनक घटना घडली आहे. सरकारी कर्तव्य बजावत असताना झालेल्या या हल्ल्यामुळे महावितरण कर्मचाऱ्यांमध्ये भीती आणि संतापाचे वातावरण असून, ग्रामीण भागातील कर्मचाऱ्यांच्या सुरक्षेचा मुद्दा पुन्हा एकदा ऐरणीवर आला आहे.
मिळालेल्या माहितीनुसार, वायरमन संतोष बोऱ्हाडे हे आपल्या सहकाऱ्यांसह थकीत वीज देयकाच्या वसुलीसाठी गाडकवाडी परिसरात गेले होते. यावेळी संदीप सरडे आणि रामदास सरडे या दोन भावांनी वसुलीच्या कारणावरून बोऱ्हाडे यांच्याशी वाद घालण्यास सुरुवात केली. वादाचे रूपांतर पुढे शिवीगाळ आणि मारहाणीत झाले. या दोन्ही भावांनी जमावासमोर वायरमनला बेदम मारहाण केली. या घटनेचा व्हिडिओ सोशल मीडियावर व्हायरल झाला असून, त्यात आरोपींचा उद्दामपणा स्पष्टपणे दिसून येत आहे.
या गंभीर प्रकारानंतर संतोष बोऱ्हाडे यांनी खेड पोलिस ठाण्यात धाव घेऊन तक्रार दाखल केली आहे. पोलिसांनी दोन्ही आरोपी भावांविरुद्ध सरकारी कामात अडथळा निर्माण करणे, मारहाण करणे आणि सार्वजनिक शांततेचा भंग केल्याप्रकरणी गुन्हा दाखल केला आहे. महावितरणच्या कर्मचाऱ्यांनी या घटनेचा तीव्र निषेध केला असून आरोपींवर कडक कारवाई करण्याची मागणी केली आहे. पोलिस आता या प्रकरणाचा पुढील तपास करत असून अशा हिंसक प्रवृत्तींना आळा घालण्यासाठी काय पावले उचलली जातात, याकडे सर्वांचे लक्ष लागले आहे.
