खेड (पुणे): पुण्याच्या खेड तालुक्यातून (Khed News) एक धक्कादायक घटना समोर आली आहे. ज्या व्यक्तीसोबत विश्वासाने कामावर जाण्यासाठी निघाली त्याच व्यक्तीने तिचा निर्घृण खून केल्याचे उघड झाले आहे. आरोपीने 30 वर्षीय पार्वती दराडे यांचा गळा आवळून हत्या केल्यानंतर, आत्महत्या वाटावी यासाठी आरोपीने त्यांचा मृतदेह झाडाला लटकवून पोलिसांची दिशाभूल करण्याचा प्रयत्न केला. मात्र, आळंदी पोलिसांनी हा ‘सुसाईड ड्रामा’ अवघ्या काही तासांत उघड केला आहे.
मृत पार्वती दराडे आणि आरोपी विष्णू महादेव पावडे (32, मूळ रा. परभणी) हे दोघेही एकाच ठिकाणी कामाला होते. शुक्रवारी दुपारी नेहमीप्रमाणे ते दुचाकीवरून कामावर निघाले होते. मात्र, विष्णूने पार्वतीला एका निर्जन जंगलात नेले. तिथे दोघात वाद झाला आणि विष्णूने पार्वतीचा गळा आवळून त्यांचा जीव घेतला.
गुन्हा केल्यानंतर कायद्याच्या कचाट्यातून वाचण्यासाठी आरोपीने पुरावे नष्ट करण्याचा प्रयत्न केला. पार्वती यांच्याच ओढणीने आणि स्कार्फने त्यांचा मृतदेह झाडाला लटकवला. जंगलातील झाडाला लटकलेला मृतदेह पाहून कोणालाही ही आत्महत्या वाटली असती. परंतु शरीरावरील खुणा आणि घटनास्थळाची स्थिती पाहून पोलिसांना पहिल्याच क्षणी संशय आला.
पार्वती यांच्या मोबाईलचे लोकेशन आणि त्या शेवटच्या कोणासोबत दिसल्या, याचा छडा लावला असता विष्णूचे नाव समोर आले. पोलिसांनी त्याला ताब्यात घेऊन खाक्या दाखवताच त्याने आपला गुन्हा मान्य केला.
