पुणे : शिवसेना ठाकरे गटातील राजकीय घडामोडींना सध्या वेग आला असून पक्षाला एकामागून एक मोठे धक्के बसत आहेत. नुकताच पक्षाच्या 9 पैकी 6 खासदारांनी बंडखोरी करत मुख्यमंत्री एकनाथ शिंदे यांच्या उपस्थितीत शिंदे गटात प्रवेश केला. हा उद्धव ठाकरे यांच्यासाठी खूप मोठा धक्का मानला जात असतानाच, आता ठाकरे गटाच्या उपनेत्या शुभांगी पाटील या देखील शिंदे गटात जाणार असल्याच्या चर्चा राजकीय वर्तुळात रंगू लागल्या आहेत.
मात्र, शुभांगी पाटील यांनी या सर्व चर्चांचे पूर्णपणे खंडन केले आहे. सध्या आपण कोणत्याही दुसऱ्या पक्षात जाणार नसल्याचे त्यांनी स्पष्ट केले आहे. सध्या कोणत्याही निवडणुका जाहीर झालेल्या नाहीत किंवा कोणतेही अर्ज भरायचे नसल्यामुळे पक्षप्रवेशाचा प्रश्नच येत नाही, असे मत त्यांनी व्यक्त केले आहे
दुसरीकडे, ठाकरे गटाचे आणखी काही आमदार आणि मुंबई महानगरपालिकेचे माजी नगरसेवक आपल्या संपर्कात असल्याचा दावा शिंदे गटाच्या नेत्यांकडून केला जात आहे. सचिन अहिर यांच्याबाबतही वेगवेगळ्या चर्चा सुरू आहेत. त्यामुळे आगामी काळात शिवसेना ठाकरे गटाला आणखी मोठे धक्के बसणार का आणि मुंबईतील राजकीय समीकरणे कशी बदलणार, याकडे सर्वांचे लक्ष लागले आहे.
