आदित्य बोराटे
इंदापूर: इंदापूर नगरपरिषदेतील भाजपचे विरोधी पक्षनेते अनिल (अण्णा) पवार यांच्यावर गुरुवारी नगरपरिषद कार्यालयासमोर जीवघेणा हल्ला करण्याचा प्रयत्न झाल्याने शहरात खळबळ उडाली. नगरपरिषदेची बैठक संपल्यानंतर कार्यालयातून बाहेर पडत असताना चार अज्ञात हल्लेखोरांनी चॉपर व चाकूसारख्या धारदार शस्त्रांसह त्यांच्यावर अचानक धाव घेत हल्ला करण्याचा प्रयत्न केल्याची माहिती समोर आली आहे.
मात्र, प्रसंगावधान राखत अनिल पवार यांनी स्वतःचा बचाव केल्याने ते थोडक्यात बचावले. यावेळी त्यांना वाचविण्यासाठी धावून गेलेले वसीम शेख हे हल्ल्यात जखमी झाले असून त्यांच्यावर उपचार सुरू आहेत.
भरदिवसा नगरपरिषद कार्यालयासमोर घडलेल्या या घटनेमुळे परिसरात काही काळ तणावाचे वातावरण निर्माण झाले. घटनेची माहिती मिळताच पोलिसांनी घटनास्थळी धाव घेत पाहणी करून तपासाची सूत्रे हाती घेतली. हल्लेखोरांची ओळख पटविण्यासाठी परिसरातील सीसीटीव्ही फुटेजची तपासणी सुरू असून हल्ल्यामागील नेमके कारण अद्याप स्पष्ट झालेले नाही. या प्रकरणी गुन्हा दाखल करण्याची प्रक्रिया सुरू असून पुढील तपास पोलीस करीत आहेत.
