पुणे: नात्यातील विश्वास, रक्ताची नाती आणि माणुसकीला काळिमा फासणारी एक संतापजनक घटना खेड तालुक्यातील चाकण परिसरातून समोर आली आहे. एका अल्पवयीन मुलीवर तिच्याच चुलत भावाने अत्याचार केले आणि हे कृत्य लपवण्यासाठी तिचा बालविवाह करण्यात आला. या प्रकरणी उत्तर चाकण पोलिसांनी किशोर गंगाधर वाईकर (चुलत भाऊ), गंगाधर चिमाजी वाईकर, अविनाश बाळासाहेब गोडे (पती), आण्णा मोरकर आणि आणखी 3 महिलांविरुद्ध ‘पोक्सो’ आणि बालविवाह प्रतिबंधक कायद्यानुसार गुन्हा दाखल केला आहे.
समोर आलेल्या माहितीनुसार, पीडित मुलगी आपल्या चुलत भावाच्या घरी त्याच्या गरोदर पत्नीची देखभाल करण्यासाठी गेली होती. मात्र, तिथेच बहिणीला पाहून भावाची नजर फिरली आणि त्याने तिच्यावर अत्याचार केला. फोटो व्हायरल करण्याची आणि जीवे मारण्याची धमकी देऊन त्याने या अल्पवयीन मुलीवर वारंवार अत्याचार केले. या क्रौर्यामुळे पीडिता गरोदर राहिली होती.
आपले कृत्य समोर येईल या भीतीने आरोपी किशोरने डॉक्टरांची दिशाभूल करून पीडितेचा गर्भपात घडवून आणला. इतक्यावरच न थांबता, हे प्रकरण कायमचे दाबण्यासाठी त्याने 27 जानेवारी 2026 रोजी मेहुणा अविनाश गोडे पीडितेचा विवाह लावून दिला. मात्र लग्नानंतरही पतीला ती अल्पवयीन असल्याचे माहित असूनही त्याने तिच्यावर जबरदस्ती केली.
