लोणी काळभोर : रस्त्यावर पार्क केलेल्या गाड्या तीन मद्यपी टवाळखोरांनी फोडल्याची घटना घडली आहे. ही घटना कदमवाकवस्ती (ता.हवेली) ग्रामपंचायत हद्दीतील पालखी स्थळाजवळ असलेल्या पठारे वस्ती रस्त्यावर आज शनिवारी (ता.19) सकाळी सहा वाजता घडली आहे. या घटनेत रिक्षा व दुचाकींचे नुकसान झाले आहे.
मिळालेल्या माहितीनुसार, हे आरोपी हे शिवाजीनगर येथील असून ते इको गाडीतून आले होते. तिने आरोपींनी चालकाला पाठीमागे बसवले होते तर आरोपींनी गाडीवर ताबा घेतला होता. आरोपी गाडी घेऊन कदमवाकवस्ती येथे आले असता, इको गाडीचा चालक चलाखी दाखवून गाडीतून बाहेर पडला. त्यामुळे तीनही आरोपींनी पठारे वस्तीच्या रस्त्यावर गाडी लावली. आणि धूम ठोकली.
दरम्यान, आरोपी माघारी परत जात असताना त्यांनी रस्त्यावर पार्क केलेल्या दुचाकी रस्त्यावर पाडल्या तर तीन रिक्षांवर धारधार शस्त्राने वार करून फोडल्या. आणि आरोपी तेथून पसार झाले. या घटनेची माहिती मिळताच लोणी काळभोर पोलीस घटनास्थळी दाखल झाले असून पुढील कार्यवाही सुरू आहे.
