पुणे : पुणे, पिंपरी-चिंचवड आणि बारामती परिसरातील रुग्णवाहिकांसाठी सुधारित भाडेदर लागू करण्यात आले आहेत. रुग्णवाहिकेत रुग्ण बसल्यापासून परतीच्या प्रवासापर्यंतचे अंतर या दरानुसार मोजले जाणार आहे. ठरवून दिलेल्या दरापेक्षा अधिक पैसे आकारणाऱ्या रुग्णवाहिका चालक आणि मालकांवर दंडात्मक कारवाई केली जाणार असल्याची माहिती प्रादेशिक परिवहन अधिकारी अर्चना गायकवाड यांनी दिली.
सुधारित दरांनुसार, वातानुकूलित नसलेल्या मारुती व्हॅनसाठी 25 किलोमीटर किंवा 2 तासांसाठी 700 रुपये आकारता येतील. त्यानंतर प्रत्येक किलोमीटरसाठी 16 रुपये आणि प्रतीक्षा कालावधीसाठी तासाला 125 रुपये दर निश्चित करण्यात आला आहे. मारुती ईको आणि टाटा मॅजिकसाठी 25 किलोमीटर किंवा 2 तासांसाठी 900 रुपये, त्यानंतर प्रत्येक किलोमीटरसाठी 17 रुपये आणि प्रतीक्षा शुल्क 125 रुपये राहणार आहे. महिंद्रा बोलेरो आणि फोर्स क्रुझरसाठी सुरुवातीचा दर 1,200 रुपये असून त्यानंतर प्रत्येक किलोमीटरला 18 रुपये आकारता येतील.
फोर्स टेम्पो ट्रॅव्हलरसाठी 25 किलोमीटर किंवा 2 तासांसाठी 1,500 रुपये, तर त्यापुढे प्रत्येक किलोमीटरसाठी 22 रुपये दर निश्चित करण्यात आला आहे. वातानुकूलित फोर्स टेम्पो ट्रॅव्हलरच्या अतिदक्षता विभागासाठी सुरुवातीचा दर 2,500 रुपये असून पुढील प्रत्येक किलोमीटरसाठी 30 रुपये आकारता येतील.
वाहनांच्या प्रकारानुसार 300 किलोमीटर किंवा प्रतिदिन वापरासाठी 4,000 ते 10,000 रुपयांपर्यंत दर निश्चित करण्यात आले आहेत. इंधन, देखभाल, दुरुस्ती आणि चालकाचा खर्च वेगळ्या दरानुसार लागू होणार आहे. ठरलेल्या दरापेक्षा जास्त भाडे घेतल्यास पहिल्या गुन्ह्यासाठी 5,000 रुपये, दुसऱ्या गुन्ह्यासाठी 10,000 रुपये आणि तिसऱ्या तसेच त्यानंतरच्या प्रत्येक गुन्ह्यासाठी 20,000 रुपयांचा दंड आकारला जाणार आहे.
