अक्षय टेमगिरे
शिक्रापूर : गावठी दारू तयार करण्यासाठी हातभट्टी पेटवून नागरिकांच्या आरोग्याशी खेळ करणाऱ्या चार फरार आरोपींना शिक्रापूर पोलिसांनी जेरबंद केले आहे.
कच्चे व उकळलेले रसायन लोखंडी व प्लास्टिकचे बॅरल आदी साहित्याच्या सहाय्याने बेकायदा गावठी दारूची निर्मिती सुरू असल्याचे पोलिसांच्या कारवाईत उघड झाले आहे.
शिक्रापूर पोलीस ठाण्याच्या हद्दीत हातभट्टी लावून गावठी दारू तयार करणाऱ्या आरोपींचा पोलिसांकडून शोध सुरू होता त्यानुसार मागील एका महिन्यात पोलिसांनी विश्वरूप उर्फ शहारूख राजकमल बिरावत, पुरुषोत्तम उर्फ काळु हीरामन राजपूत, जालींदर उर्फ सिलोन राकेश बिरावत आणि वाल्मीक सिलोन बिरावत यांना अटक केली आहे.
आरोपींकडून दारू निर्मितीसाठी कच्चे तसेच उकळलेले रसायन आणि विविध प्रकारच्या बॅरलचा वापर केला जात होता. या प्रक्रियेत तयार होणारे अपायकारक व नशाकारक द्रव्य मानवी आरोग्यासाठी धोकादायक ठरण्याची शक्यता असल्याने पोलिसांनी ही कारवाई गांभीर्याने केली असून.
या प्रकरणी शिक्रापूर पोलीस ठाण्यात एकूण चार जणांवर गुन्हे दाखल करण्यात आले असून आरोपींवर भारतीय न्याय संहितेतील संबंधित कलमांसह महाराष्ट्र दारूबंदी अधिनियमातील कलमान्वये गुन्हा दाखल करण्यात आला आहे.
पुणे ग्रामीणचे पोलीस अधीक्षक संदिपसिंह गिल्ल, अपर पोलीस अधीक्षक शुभम कुमार आणि शिरूरचे उपविभागीय पोलीस अधिकारी रविंद्र भोसले यांच्या मार्गदर्शनाखाली ही कारवाई करण्यात आली असून शिक्रापूर पोलीस स्टेशनचे पोलीस निरीक्षक चंद्रशेखर यादव यांच्या नेतृत्वाखाली पोलीस हवालदार रोहीदास पारखे, श्रीमंत होनमाने, अमोल दांडगे, बापू हाडगळे, शिवाजी चितारे, अमोल नलगे, नारायण वाळके, राम जाधव आणि मच्छिंद्र निचीत यांच्या पथकाने कारवाई केली आहे.
गावठी दारूच्या नावाखाली विषारी रसायनांचा वापर करून सुरू असलेल्या या अवैध व्यवसायावर पोलिसांनी कारवाई केल्याने परिसरातील नागरिकांकडून पोलिसांचे सर्वत्र कौतुक होत असून तर या कारवाईमुळे अवैध हातभट्टी चालकांमध्ये चांगलीच खळबळ उडाली आहे.
