पिंपरी-चिंचवड: पिंपरी-चिंचवड शहरातील डांगे चौक परिसरात आई आणि तिच्या 6 वर्षांच्या मुलाचा मृत्यू झाल्याची धक्कादायक घटना समोर आली आहे. सिग्नेचर पार्क सोसायटीमध्ये शुक्रवारी (30 ऑक्टोबर) सायंकाळी साडेसहाच्या सुमारास ही घटना घडली. एकता मनोज भांगड आणि माधव मनोज भांगड अशी मृत मायलेकाचं नावं आहे. या घटनेमुळे परिसरात हळहळ व्यक्त होत आहे.
घटनेची माहिती मिळताच वाकड पोलिसांनी घटनास्थळी धाव घेतली. प्राथमिक माहितीनुसार, आई आणि मुलगा इमारतीच्या 18 व्या मजल्यावरून खाली पडल्याचे समोर आले आहे. पोलिसांनी फॉरेन्सिक पथकाच्या मदतीने घटनास्थळाची पाहणी करून आवश्यक पुरावे गोळा केले.
महिलेने लिहिलेली चिठ्ठी सापडली
या प्रकरणात पोलिसांना मृत महिलेने लिहिलेली चिठ्ठी आढळली आहे. या चिठ्ठीत महिलेने आपल्या आजारपणामुळे हे टोकाचे पाऊल उचलल्याचा उल्लेख केला आहे. तसेच कौटुंबिक परिस्थिती आणि मुलाच्या भविष्याबाबत चिंता व्यक्त केल्याची माहिती समोर आली आहे. तसेच, आपल्या मृत्यूनंतर पतीने नव्याने आयुष्य सुरू करावे आणि लग्न करावे, ,असाही उल्लेख असल्याचे सांगितले जात आहे.
मुलाच्या भविष्याबाबत आणि स्वतःच्या अनुपस्थितीत त्याची काळजी कोण घेईल, याविषयीही तिने चिठ्ठीत लिहिल्याचे समजते. सध्या पोलीस या चिठ्ठीतील मजकुराची पडताळणी करत आहेत.
एकता या गृहिणी होत्या, तर त्यांचे पती येरवडा येथील एका आयटी कंपनीत इंजिनिअर म्हणून कार्यरत आहेत. हे कुटुंब मूळचे राजस्थानमधील असून, गेल्या 2 वर्षांपासून सिग्नेचर पार्क सोसायटीमध्ये राहत होते. या घटनेमागील नेमके कारण अद्याप स्पष्ट झालेले नाही. कौटुंबिक पार्श्वभूमी, चिठ्ठीतील मजकूर आणि इतर पुराव्यांच्या आधारे वाकड पोलीस पुढील तपास करत आहेत.
