लोणी काळभोर: हवेली शिक्षक सोसायटीच्या तालुका (Haveli News) स्तरीय क्रिकेट स्पर्धेचा मानकरी हा पश्चिम हवेलीतील सिहंगड टायगर्स संघ ठरला आहे. या स्पर्धेत नगर रोड चा शिवनेरी पँथर्स संघ उपविजेता तर तिसऱ्या स्थानावर पूर्व हवेलीच्या पुरंदर वॉरियर्स संघाला समाधान मानावे लागले आहे. (Pune News)
हवेली तालुका प्राथमिक शिक्षक को.ऑप. क्रेडिट सोसायटीच्या शताब्दी वर्षानिमित्त तालुका स्तरीय भव्य क्रिकेट स्पर्धा वाघोली (ता. हवेली) येथे नुकत्याच पार पडल्या. या स्पर्धेचे उद्घाटन हवेली तालुक्याचे गटशिक्षण अधिकारी हेमंतकुमार खाडे यांच्याहस्ते करण्यात आले. या सामन्यात तालुक्यातील अनेक संघांनी सहभाग घेतला होता. यावेळी खेळाडूंना टी-शर्ट चे वाटप करण्यात आले. संस्थेचे अध्यक्ष दिगंबर सुपेकर यांनी सर्व खेळाडू व मान्यवरांचे स्वागत केले.
यावेळी बोलताना हेमंतकुमार खाडे म्हणाले की, जीवनात खेळातील सहभागाला मोठे महत्त्व आहे. समस्यांना सामोरे जाऊन आपल्या खेळाकडे लक्ष केंद्रित करतो तोच यशस्वी होतो. आज प्रत्येक खेळांत अनेक क्रांतिकारक बदल होत आहेत. प्रत्येक खेळाडूची शारीरिक तंदुरुस्ती, सुंदरता त्याला वेगळी ओळख देते, असे खाडे यांनी यावेळी बोलताना सांगितले.
दरम्यान, सिहंगड टायगर्स संघाने अत्यंत अटीतटीच्या झालेल्या सामन्यात विजेतेपद पटकावले. संघांचे राष्ट्रीय कार्याध्यक्ष राजेश काळभोर यांच्या हस्ते खेळाडूला मालिकावीराचा पुरस्कार देण्यात आला. तर हवेली शिक्षक संघांचे रमेश कुंजीर, जयवंत मोहिते, सुरेश कटके यांच्या हस्ते खेळाडूला सामनावीर पुरस्कार प्रदान करण्यात आला. स्पर्धेसाठी हवेली तालुक्यातील शिक्षकवृंद मोठ्या संख्येने उपस्थित होते. पारितोषिक वितरणानंतर संस्थेचे सचिव ग. प्र. जाधव यांनी उपस्थितांचे आभार मानले.
