पुणे: पुण्यातील कल्याणीनगर भागात घडलेल्या बहुचर्चित आणि भीषण पोर्शे कार अपघातातील मुख्य आरोपी, बांधकाम व्यावसायिक विशाल अग्रवाल याच्या जामीन मंजुरीनंतरचा एक धक्कादायक व्हिडिओ सध्या समोर आला आहे. या अपघातात २ वर्षांपूर्वी एका तरुण आणि तरुणीला आपला जीव गमवावा लागला होता, ज्यामुळे संपूर्ण महाराष्ट्र हादरला होता. नुकताच सर्वोच्च न्यायालयाकडून जामीन मिळाल्यानंतर, अग्रवाल कुटुंबाने घरात प्रचंड जल्लोष करत मोठी पार्टी केल्याचे या व्हिडिओमध्ये उघड झाले आहे.
इंटरनेटवर धुमाकूळ घालत असलेल्या या क्लिपमध्ये, विशाल अग्रवाल आणि त्याची पत्नी ५०० च्या नोटांच्या माळा गळ्यात घालून थिरकताना दिसत आहेत. बॅकग्राउंडला गाणे लावून संपूर्ण अग्रवाल कुटुंब एकत्र येत जोरदार जल्लोष करताना या व्हिडिओत स्पष्टपणे कैद झाले आहे. हा प्रकार समोर येताच पुणेकरांसह सर्वच स्तरातून संताप व्यक्त केला जात असून, यामुळे अग्रवाल कुटुंबाच्या कायदेशीर अडचणींमध्ये आणखी मोठी वाढ होण्याची चिन्हे आहेत.
या भीषण अपघातामध्ये दोन निरपराध तरुणांना आपले प्राण गमवावे लागले होते. या घटनेनंतर सुरुवातीच्या काळात अल्पवयीन मुलाला बालसुधारगृहात पाठवण्यात आले होते, तर त्याचे वडील विशाल अग्रवाल याला पोलिसांनी अटक केली होती. परंतु, आता सुटका होताच विशाल अग्रवाल यांच्या निवासस्थानी जल्लोष केला जात असल्यामुळे लोकांमध्ये प्रचंड संताप आहे. मात्र, या नव्या व्हिडिओने अग्रवाल कुटुंबाचा असंवेदनशील चेहरा पुन्हा एकदा समाजासमोर आणला आहे.
