पुणे: पुण्यात किरकोळ कारणावरून झालेल्या वादाने गंभीर स्वरूप धारण केल्याची घटना मुंढवा परिसरातून समोर आली आहे. केशवनगर भागात रस्त्यावर थुंकण्याच्या कारणावरून सुरू झालेल्या वादानंतर काही तरुणांनी दोन जणांना बेदम मारहाण केल्याचा आरोप आहे. या हल्ल्यात लोखंडी हत्याराचा वापर करण्यात आल्याने दोघेही जखमी झाले आहेत.
मंगळवारी 15 सप्टेंबर रोजी रात्री साडेआठच्या सुमारास हा प्रकार घडल्याचे पोलिसांनी सांगितले. घटनेची माहिती मिळाल्यानंतर मुंढवा पोलिसांनी तपास सुरू केला. या प्रकरणात 5 आरोपींविरोधात गुन्हा दाखल करण्यात आला असून, एका अल्पवयीन मुलाला पोलिसांनी ताब्यात घेतले आहे.
मिळालेल्या माहितीनुसार, विशाल रणदिवे आणि सूरज कांबळे हे दोघे केशवनगर परिसरात असताना विशालचा कृष्णा गायकवाड याच्यासोबत वाद झाला. कृष्णा गायकवाड याने काही साथीदारांना घटनास्थळी बोलावले आणि संबंधित टोळक्याने विशाल आणि सूरज यांच्यावर हल्ला केला. दोघांना आधी मारहाण करण्यात आली. त्यानंतर लोखंडी हत्याराच्या उलट्या बाजूनेही त्यांना मारण्यात आल्याचे तक्रारीत नमूद करण्यात आले आहे. हल्ल्यात त्यांच्या डाव्या पायाच्या मांडीला दुखापत झाली.
जखमी झाल्यानंतर सूरज कांबळे यांनी मुंढवा पोलीस ठाण्यात धाव घेत तक्रार नोंदवली. या तक्रारीच्या आधारे पोलिसांनी कृष्णा गायकवाड (19), समक्ष जाधव (19), आदित्य गायकवाड (20), अथर्व जाधव (19) आणि ओम गव्हाणे (19) यांच्याविरोधात गुन्हा दाखल केला आहे.
