पुणे: हडपसर-घोरपडी तिसऱ्या रेल्वे मार्गाचे काम पुढे नेण्यासाठी मध्य रेल्वेकडून पुणे विभागात विशेष कामे हाती घेण्यात येणार आहेत. पुणे आणि हडपसर यार्डमध्ये ट्रॅक, सिग्नल-टेलिकॉम आणि ओव्हरहेड उपकरणांशी संबंधित कामे या कालावधीत केली जाणार आहेत. यासाठी 19 सप्टेंबरपासून 4 ऑक्टोबरपर्यंत विविध टप्प्यांमध्ये रेल्वे ब्लॉक घेण्यात येणार आहे.
या कामामुळे पुणे-सोलापूर मार्गावरील नियमित रेल्वेसेवेचे वेळापत्रक काही दिवस बदलणार आहे. काही गाड्या रद्द केल्या जाणार असून काही रेल्वेगाड्या पूर्ण मार्गाऐवजी ठराविक स्थानकांपर्यंतच धावतील. काही सेवांना पर्यायी मार्गाने पाठवले जाणार आहे. त्यामुळे या काळात प्रवास करणाऱ्या नागरिकांनी रेल्वेची अद्ययावत माहिती घेऊनच प्रवासाचे नियोजन करणे आवश्यक आहे.
पुणे आणि सोलापूरदरम्यान धावणाऱ्या इंटरसिटी एक्स्प्रेसच्या सेवेलाही याचा फटका बसणार आहे. 12169 पुणे-सोलापूर इंटरसिटी आणि 12170 सोलापूर-पुणे इंटरसिटी या दोन्ही गाड्या 19 ते 23 सप्टेंबर तसेच 3 आणि 4 ऑक्टोबरला रद्द करण्यात आल्या आहेत.
सिद्धेश्वर एक्स्प्रेसच्या दोन सेवांमध्येही बदल करण्यात आला आहे. 12116 ही गाडी 3 ऑक्टोबरला, तर 12115 ही गाडी 4 ऑक्टोबरला रद्द राहणार आहे. हुतात्मा एक्स्प्रेसच्या सेवेतही काही दिवस बदल होणार आहेत. 12157 आणि 12158 या गाड्यांच्या फेऱ्यांवर ब्लॉकचा परिणाम होईल.
दरम्यान, लांब पल्ल्याच्या अनेक रेल्वेगाड्यांचे मार्ग तात्पुरते बदलण्यात येणार आहेत. मुंबई-चेन्नई, मुंबई-भुवनेश्वर, एलटीटी-काकीनाडा, नागरकोईल-एलटीटी, बंगळुरू-मुंबई आणि विशाखापट्टणम-एलटीटी या मार्गांवरील गाड्यांचाही त्यात समावेश आहे.
पर्यायी मार्गांपैकी काही गाड्या सोलापूर-कुर्डुवाडी-मिरज-सातारा-पुणे या मार्गाने धावतील. तर काही सेवांना दौंड-अहिल्यानगर-मनमाड-इगतपुरी-कल्याण मार्गाचा वापर करावा लागणार आहे. त्यामुळे काही गाड्यांना पुणे, लोणावळा, दौंड आणि उरुळी या स्थानकांवर थांबा किंवा नियमित मार्गाची सेवा मिळणार नाही.
याशिवाय 11422 सोलापूर-पुणे एक्स्प्रेस 3 ऑक्टोबरला हडपसरपर्यंतच चालवली जाईल. 11302 उद्यान एक्स्प्रेसची सेवा त्याच दिवशी सोलापूरपर्यंत मर्यादित राहणार आहे. 11301 मुंबई-बंगळुरू एक्स्प्रेस 4 ऑक्टोबरला सोलापूरहून अंशतः सुरू करण्यात येणार आहे.
