पुणे : उरुळी कांचन पोलीस ठाण्याच्या आवारात पैशांच्या व्यवहारावरून दोन गटांतील महिलांमध्ये जोरदार वाद झाल्याचा प्रकार समोर आला आहे. सावकाराच्या कथित त्रासाबाबत तक्रार करण्यासाठी आलेल्या महिलेच्या विरोधात काही महिला पोलीस ठाण्यात दाखल झाल्या. त्यानंतर पोलिसांसमोरच दोन्ही बाजूंमध्ये शाब्दिक वाद झाला आणि काही काळ वातावरण तणावपूर्ण बनले.
मिळालेल्या माहितीनुसार, एका महिलेने खासगी सावकाराकडून 3,14,000 रुपयांचे कर्ज घेतले होते. मात्र, कर्जाच्या रकमेपेक्षा कितीतरी अधिक पैसे परत करूनही तिच्याकडून आणखी पैशांची मागणी केली जात असल्याचा आरोप तिने केला आहे. संबंधित महिलेच्या म्हणण्यानुसार, आतापर्यंत तिने सावकाराला तब्बल 10,84,000 रुपये दिले आहेत.
View this post on Instagram
कर्जाची रक्कम परत केल्यानंतरही त्रास आणि पैशांसाठी दबाव सुरू असल्याचा दावा महिलेने केला. त्यामुळे तिने सावकाराविरोधात तक्रार करण्याचा निर्णय घेतला आणि आपली बाजू मांडण्यासाठी उरुळी कांचन पोलीस ठाणे गाठले.
महिला पोलिसांकडे तक्रार सांगत असताना संबंधित सावकारही पोलीस ठाण्यात उपस्थित होता. त्याचवेळी त्याच्या बाजूने काही महिला तेथे आल्या. त्यानंतर तक्रारदार महिला आणि दुसऱ्या गटातील महिलांमध्ये वाद सुरू झाला.
तक्रारदार महिलेने सावकाराविरोधात बेकायदेशीर सावकारी केल्याचा गुन्हा दाखल करण्याची मागणी केली आहे. कर्जाच्या तुलनेत मोठी रक्कम परत करूनही आणखी पैशांसाठी दबाव आणला जात असल्याचा तिचा आरोप आहे.
दरम्यान, पोलीस ठाण्यात झालेल्या या गोंधळाचीही पोलिसांनी गंभीर दखल घेतली आहे. या प्रकरणात तक्रारदार महिला आणि संबंधित सावकार या दोघांविरोधात उरुळी कांचन पोलीस ठाण्यात गुन्हा दाखल करण्यात आला आहे.
