पुणे: पुणे जिल्ह्यातील बारामती, दौंड आणि इंदापूर (Bhigwan Kidnapping Case) तालुक्यांत उद्या बंदची हाक देण्यात आली आहे. भिगवण प्रकरणाच्या निषेधार्थ (MLA Rahul Kul) सकल हिंदू समाजाच्या वतीने बारामती येथील अहिल्या भवन येथे बैठक आयोजित करण्यात आली होती. या बैठकीत सोमवारी बंद पाळण्याचा निर्णय घेण्यात आला. (Indapur News)
बैठकीत संबंधित प्रकरणातील आरोपींना कठोर कारवाई व्हावी, अशी मागणी करण्यात आली. आरोपींना मदत केली जात आहे आणि हिंदू समाजाच्या विरोधात भूमिका घेतली जात असल्याचा आरोप करत आमदार राहुल कुल यांचाही निषेध व्यक्त करण्यात आला. या बैठकीत तीन प्रमुख मागण्या मांडण्यात आल्या. भिगवण प्रकरणात आरोपींवर पोक्सो कायद्यांतर्गत गुन्हा दाखल करावा, महाराष्ट्रात धर्मांतरणविरोधी कायदा लागू करून त्याची काटेकोर अंमलबजावणी करावी आणि तथाकथित ‘लव्ह जिहाद’ विरोधात स्वतंत्र कायदा करावा, अशा मागण्या करण्यात आल्या.
बैठकीत वक्त्यांनी धर्मांतरण प्रक्रियेसाठी राज्य शासनाची पूर्वपरवानगी अनिवार्य करावी, असे मत व्यक्त केले. लग्नानंतर धर्मांतरणाच्या घटनांवर नियंत्रण आणण्यासाठी कठोर कायद्याची गरज असल्याचेही काही वक्त्यांनी सांगितले. खोटे आमिष, प्रलोभन किंवा ब्लॅकमेलिंगच्या माध्यमातून विवाह झाल्यास दोषींना किमान 10 वर्षांची सश्रम कारावासाची शिक्षा देणारा कायदा राज्य सरकारने करावा, अशी मागणीही पुढे आली.
दरम्यान, या पार्श्वभूमीवर कायदा व सुव्यवस्था अबाधित राहावी यासाठी पोलिस प्रशासन सतर्क झाले आहे. बंदच्या आवाहनामुळे बाजारपेठा, शैक्षणिक संस्था आणि सार्वजनिक वाहतूक यावर काही प्रमाणात परिणाम होण्याची शक्यता व्यक्त केली जात आहे. प्रशासनाने नागरिकांना अफवांवर विश्वास न ठेवता शांतता राखण्याचे आवाहन केले आहे. या आंदोलनाच्या पार्श्वभूमीवर जिल्ह्यातील राजकीय वातावरण तापले असून संबंधित प्रकरणाची चौकशी आणि पुढील कारवाईकडे सर्वांचे लक्ष लागले आहे.
