लोणी काळभोर. ता, 22 : लोणी काळभोर (ता. हवेली) येथील रेनबो इंटरनॅशनल (Loni Kalbhor) स्कूलमध्ये छत्रपती शिवाजी महाराज यांची जयंती मोठ्या उत्साहात आणि जल्लोषात साजरी करण्यात आली. “छत्रपती शिवाजी महाराज की जय”च्या जयघोषांनी संपूर्ण परिसर दुमदुमून गेला आणि वातावरण शिवमय झाले.
कार्यक्रमाची सुरुवात सरस्वती प्रतिमा व शिवरायांच्या प्रतिमेला पुष्पहार अर्पण करून तसेच दीपप्रज्वलनाने करण्यात आली. अध्यक्षस्थानी शाळेचे अध्यक्ष नितीन काळभोर, संचालिका मंदाकिनी काळभोर, प्राचार्या मीनल बंडगर, उपप्राचार्य प्रशांत लाव्हरे तसेच पर्यवेक्षिका पायल बोळे उपस्थित होते.
शिवजन्मोत्सवाच्या आगळ्या वेगळ्या सादरीकरणाने कार्यक्रमाची रंगत वाढली. मान्यवर, शिक्षक व विद्यार्थ्यांच्या उपस्थितीत बाळ शिवबाचा पाळणा साजरा करण्यात आला. संगीत शिक्षक कार्तिक गोरखे यांच्या मार्गदर्शनाखाली विद्यार्थ्यांनी सादर केलेल्या पाळण्याने उपस्थितांना भारावून टाकले. इयत्ता दुसरीतील विद्यार्थिनींनी नृत्य शिक्षक आश्विन मनगुतकर यांच्या मार्गदर्शनाखाली सुंदर नृत्य सादर करत टाळ्यांचा कडकडाट मिळवला. साक्षी कासार हिने दिलेल्या दमदार शिवगर्जनेने सर्वांचे लक्ष वेधून घेतले.
इयत्ता तिसरीतील रुद्र सैतवाल याने शिवाजी महाराजांच्या जीवनावर आधारित थरारक पोवाडा सादर करून अंगावर शहारा आणला. इयत्ता सहावीतील विश्वजीत गिरी याने आपल्या प्रभावी भाषणातून शिवरायांचा प्रेरणादायी जीवनपट उलगडला. तसेच इयत्ता सहावीतील विद्यार्थ्यांनी ‘जय जिजाऊ जय शिवराय’ या गीतावर सादर केलेल्या नृत्याने संपूर्ण वातावरण शिवमय केले.
दरम्यान, या प्रसंगी शिव अंबेकर याने बालशिवबाची, तर शरण्या चोरमाळे हिने जिजाऊंची भूमिका उत्कृष्टपणे साकारत प्रेक्षकांची मने जिंकली. शेवटी ‘जय भवानी, जय शिवाजी’च्या घोषणांसह लेझीम, ढोल-ताशांच्या गजरात शिवाजी महाराजांच्या पालखीची भव्य मिरवणूक काढण्यात आली. कार्यक्रमाचे सूत्रसंचालन व आभार प्रदर्शन साक्षी कासार व तन्वी गोडगे यांनी केले. सर्वांच्या सहकार्याने शिवजयंतीचा सोहळा दिमाखात आणि यशस्वीरीत्या पार पडला.
