मध्य प्रदेश: मध्य प्रदेशातील धार जिल्ह्यातील गोंदी खेडा (MP News) चारण गावात घडलेल्या खून प्रकरणाचा पोलिसांनी उलगडा केला आहे. पतीचा खून करून लूटमारीचा बनाव रचणाऱ्या पत्नीला आणि तिच्या प्रियकराला अटक करण्यात आली आहे. या प्रकरणात पत्नीच मुख्य सूत्रधार असल्याचे तपासात स्पष्ट झाले आहे. (Crime News)
मृत व्यक्ती देवकृष्ण पुरोहित असून त्याची पत्नी प्रियांका आणि तिचा प्रियकर कमलेश यांनी मिळून हा कट रचला होता. विशेष म्हणजे प्रियांकाचे लग्न अल्पवयातच, अवघ्या 15 व्या वर्षी देवकृष्णसोबत झाले होते. बालविवाह झाल्यामुळे दोघेही अनेक वर्षे वेगवेगळे राहत होते.
प्रियांका 21 वर्षांची झाल्यानंतर तिला पतीसोबत राहण्यास सांगण्यात आले. मात्र ती यासाठी तयार नव्हती. याच काळात तिचे कमलेशसोबत संबंध निर्माण झाले. या नात्यामुळेच देवकृष्ण अडथळा ठरत असल्याने त्याला संपवण्याचा निर्णय घेण्यात आला.
या कटासाठी कमलेशने सुरेंद्र नावाच्या व्यक्तीला 1 लाख रुपये देऊन सुपारी दिली. ठरल्याप्रमाणे सुरेंद्रने मध्यरात्री घरात घुसून झोपेत असलेल्या देवकृष्णच्या डोक्यावर धारदार शस्त्राने वार करून त्याची हत्या केली.
हत्या लपवण्यासाठी लूटमारीचा बनाव करण्यात आला. सुरेंद्रने प्रियांकाला दुसऱ्या खोलीत बांधून ठेवले आणि नंतर निघून गेला. काही वेळाने प्रियांकाने आरडाओरडा करत शेजाऱ्यांना बोलावले आणि घरात चोरीसाठी आलेल्या व्यक्तीने पतीची हत्या केल्याचे सांगितले.
मात्र पोलिसांना हा प्रकार संशयास्पद वाटल्याने त्यांनी सखोल तपास केला. चौकशीत प्रियांकाने गुन्ह्याची कबुली दिली. पोलिसांनी अवघ्या 36 तासांत प्रियांका आणि कमलेशला अटक केली आहे. या प्रकरणातील मुख्य आरोपी सुरेंद्र अद्याप फरार असून त्याचा शोध सुरू आहे.
