पुणे : सरकारी नोकरी मिळवून देण्याचे आश्वासन देत बेरोजगार तरुण-तरुणींकडून कोट्यवधी रुपये उकळणाऱ्या टोळीचा पिंपरी-चिंचवड पोलिसांच्या आर्थिक गुन्हे शाखेने पर्दाफाश केला आहे. केंद्र सरकारच्या विविध विभागांमध्ये नोकरी लावण्याचे आमिष दाखवून 26 जणांकडून तब्बल ₹4 कोटी 88 लाख 43 हजार रुपये घेतल्याचा आरोप आहे. या प्रकरणातील मुख्य आरोपीला पोलिसांनी अटक केली आहे.
मनोज मधुकर जैन (वय 54, रा. कारंजा लाड, वाशिम) असे अटक करण्यात आलेल्या आरोपीचे नाव आहे. न्यायालयाने त्याला 10 ऑगस्ट पर्यंत पोलीस कोठडी सुनावली आहे. निगडी परिसरातील 37 वर्षीय महिलेने पोलिसांकडे तक्रार केल्यानंतर या फसवणुकीचा प्रकार उघडकीस आला.
पोलिसांच्या माहितीनुसार, आरोपी शिक्षित बेरोजगारांना हेरून त्यांच्याशी जवळीक निर्माण करायचा. केंद्र सरकारमधील वरिष्ठ अधिकाऱ्यांशी आपले संबंध असल्याचा दावा करून तो नोकरी मिळवून देण्याचे आश्वासन द्यायचा. कायमस्वरूपी सरकारी पद मिळणार असल्याने अनेक जण त्याच्या बोलण्याला भुलले.
मात्र पैसे दिल्यानंतरही संबंधितांना नोकरी मिळाली नसल्याने पीडितांच्या लक्षात आले आपली फसवणूक झाली, दरम्यान त्यांनी पोलिसांकडे धाव घेतली. तक्रारीनंतर आर्थिक गुन्हे शाखेने तपास सुरू केला आणि मुख्य आरोपी मनोज जैन याला ताब्यात घेतले. या संपूर्ण प्रकरणात आणखी कोणाचा सहभाग आहे का, आरोपीने आणखी किती जणांना अशाच पद्धतीने गंडा घातला आहे आणि फसवणुकीची रक्कम कुठे वापरली, याचा तपास सध्या सुरू आहे.
