हडपसर, ता. २४ : ड्युटीचे ठिकाण बदलल्याचा राग मनात धरून सुरक्षा रक्षकाने कंपनीच्या अकाउंटंटवर चाकूसदृश धारदार शस्त्राने जीवघेणा हल्ला केल्याची धक्कादायक घटना हडपसरमधील कांचन जोशी आर्केड येथील एका सुरक्षा सेवा कंपनीच्या कार्यालयात २३ जून रोजी सायंकाळी सातच्या सुमारास घडली. या हल्ल्यात अकाउंटंट गंभीर जखमी झाला असून त्याच्यावर उषाकिरण रुग्णालयात उपचार सुरू आहेत. ड्युटी बदलण्याच्या किरकोळ कारणावरून थेट जीवघेणा हल्ला झाल्याने सुरक्षा क्षेत्रात खळबळ उडाली आहे.
अय्युब सुलतान पठाण (वय ३४, रा. हडपसर) असे जखमी झालेल्या अकाउंटंटचे नाव आहे. तर सुरक्षा रक्षक आशिष चौबे (वय अंदाजे २९) याच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, अय्युब पठाण हे युनिक सिक्युरिटी सर्व्हिसेस या कंपनीत गेल्या चार वर्षांपासून अकाउंटंट म्हणून कार्यरत आहेत. कंपनीतील सुरक्षा रक्षकांचे वेतन आणि आर्थिक व्यवहारांची जबाबदारी त्यांच्याकडे आहे.
अय्युब पठाण कार्यालयात काम करत असताना कंपनीतील सुरक्षा रक्षक आशिष चौबे हा तेथे आला. फिल्ड ऑफिसर कुशेंद्र नागरगोजे यांनी त्याची ड्युटी मगरपट्टा येथून बदलून मेघामिल येथे दिल्याच्या कारणावरून तो संतप्त होता. याच रागातून त्याने कार्यालयात मोठमोठ्याने शिवीगाळ सुरू केली.अय्युब पठाण यांनी त्याला शांत राहण्यास सांगितले असता, आशिष चौबे याने तातडीने पगार देण्याची मागणी केली. मात्र नियमानुसार पगार तत्काळ देता येणार नसल्याचे सांगितल्याने तो आणखी संतापला. त्याने शर्टच्या आत लपवून ठेवलेले चाकूसदृश धारदार शस्त्र काढून अय्युब पठाण यांच्या पोटात वार केला. त्यानंतर डोक्यावरही वार करून त्यांना गंभीर जखमी केले.
दरम्यान, हल्ल्यानंतर आरोपी आशिष चौबे घटनास्थळावरून पसार झाला. कार्यालयातील कर्मचारी करण कांबळे याने तत्काळ अय्युब यांच्या मित्रांना बोलावले. मित्र विशाल आणि रवी यांनी जखमी अवस्थेतील अय्युब पठाण यांना रिक्षामधून उषाकिरण रुग्णालयात दाखल केले. या प्रकरणी हडपसर पोलीस ठाण्यात आशिष चौबे याच्याविरुद्ध गुन्हा दाखल करण्यात आला असून पोलीस उपनिरीक्षक रत्नदीप बिराजदार पुढील तपास करीत आहेत.
