शिरूर : पुणे-अहमदनगर महामार्गावर चुकीच्या दिशेने आलेल्या ट्रकने कारला भीषण धडक दिल्याची घटना रांजणगाव (ता. शिरूर) एमआयडीसीच्या एलजी कंपनी समोर आज बुधवारी (ता.१७) पहाटेच्या सुमारास घडली आहे. हा अपघात इतका भीषण होता कि, या अपघातात एकाच कुटुंबातील ५ जणांचा मृत्यू झाला आहे. यामध्ये ३ चिमुकल्यांचा समावेश आहे.
संजय भाऊसाहेब म्हस्के (वय-५३), राम भाऊसाहेब म्हस्के (वय-४५), राम राजू म्हस्के (वय-७), हर्षदा राम म्हस्के (वय-४), विशाल संजय म्हस्के (वय-१६) अशी अपघातात मृत्यू झालेल्यांची नावे आहेत. तर या अपघातात साधना राम म्हस्के (वरील सर्व रा. आवाने बुद्रुक जि, अहमदनगर) गंभीर जखमी झाल्या आहेत.
मिळालेल्या माहितीनुसार, म्हस्के कुटुंब हे पुण्याहून पनवेलच्या दिशेने कारमध्ये चालले होते. पुणे-अहमदनगर महामार्गावरून जात असताना, त्यांची कार रांजणगावाजवळ आली असता समोरुन चुकीच्या दिशेने येणाऱ्या ट्रकने या कारला जोरदार धडक दिली. या अपघातात ५ जणांचा जागीच मृत्यू झाला आहे. तर १ महिला गंभीर जखमी झाली आहे.त्यांना उपचारासाठी जवळील रुग्णालयात हलवण्यात आले आहे.
दरम्यान, या घटनेची माहिती मिळताच रांजणगाव एमआयडीसी पोलीस तातडीने घटनास्थळी दाखल झाले. कारच्या समोरील भाग आत गेला होता, त्यामुळे कारच्या समोर बसलेले आताच अडकून पडले होते. पोलिसांनी क्रेन ला बोलावून कार आणि ट्रक वेगवेगळे करण्यात आले. तरी, पुढील तपास पोलीस करीत आहेत.
